કહેવાય છે કે જ્યારે આપણે ખૂબ ખુશ હોઈએ છીએ ત્યારે આપણી આંખોમાંથી આંસુ વહેવા લાગે છે. પરંતુ, એક વ્યક્તિ એટલી ખુશ થઈ ગઈ કે તેનું હૃદય ધડકવાનું બંધ થઈ ગયું. આ ઘટના સિંગાપોરની છે, ત્યાંનાં એક કેસિનોમાં એક વ્યક્તિએ એટલા પૈસા જીત્યા કે તે આનંદ સહન ન કરી શક્યો અને ત્યાં તેને હાર્ટ એટેક આવ્યો. આ ઘટનાનો વીડિયો સોશિયલ મીડિયા પર ઝડપથી વાયરલ થઈ રહ્યો છે. આ ઘટના 22 જૂને સિંગાપોરના મરિના બે સેન્ડ્સ કેસિનોમાં બની હતી.

અહેવાલ મુજબ, તે વ્યક્તિએ 3.2 મિલિયન પાઉન્ડ (એટલે ​​​​કે અંદાજે 33 કરોડ રૂપિયા)નો જેકપોટ જીતતાની સાથે જ હવામાં કૂદવાનું શરૂ કર્યું. પરંતુ, બીજી જ ક્ષણે તે બેભાન થઈ ગયો અને જમીન પર પડ્યો. આ દરમિયાન કેસિનોમાં હાજર લોકો અને કર્મચારીઓમાં હોબાળો મચી ગયો હતો. વાયરલ થઈ રહેલા વીડિયોમાં પુરુષની સાથે રહેલી મહિલા જોર જોરથી રડતી અને મદદ માટે વિનંતી કરતી જોઈ શકાય છે.

ઘટના પછી, કેસિનો સ્ટાફ તરત જ એક્શનમાં આવી ગયો અને તે વ્યક્તિને તબીબી સહાય પૂરી પાડવાનો પ્રયાસ કર્યો. વ્યક્તિને તાત્કાલિક હોસ્પિટલમાં લઈ જવામાં આવ્યો હતો, જ્યાં તેની હાલત સ્થિર હોવાનું કહેવાય છે. વ્યક્તિના મૃત્યુને લઈને સોશિયલ મીડિયા પર વિવિધ અફવાઓ ઉડાવવામાં આવી હતી, જેને કેસિનોના પ્રવક્તાએ નકારી કાઢી છે. પ્રવક્તાએ કહ્યું કે, આ પ્રકારના અહેવાલોએ વ્યક્તિના પરિવારને કેટલી તકલીફો પહોંચાડી છે તેનો અંદાજ લગાવી શકાય તેમ નથી.