પૂર્વ વિદેશ મંત્રીને પણ થઇ ૧૦ વર્ષની જેલ, આગામી ૮ ફેબ્રુઆરીના રોજ પાડોશી દેશમાં યોજાશે ચુંટણી, ઓફિશિયલ સિક્રેટ એક્ટ હેઠળ રચાયેલી વિશેષ અદાલતે આપ્યો ચુકાદો

ચિતાની પહેલા પાકિસ્તાનના પૂર્વ વડાપ્રધાન ઈમરાન ખાનને મોટો ઝટકો લાગ્યો છે. આજે તેને ૧૦ વર્ષની જેલની સજા ફટકારવામાં આવી છે. સાઇફર કેસમાં પાકિસ્તાન તહરીક-એ-ઇન્સાફ (પીટીઆઇ)ના સંસ્થાપક વિરુદ્ધ આ કાર્યવાહી કરવામાં આવી છે. અહેવાલ અનુસાર, ઈમરાન ખાન સિવાય દેશના પૂર્વ વિદેશ મંત્રી શાહ મહમૂદ કુરેશીને પણ આ કેસમાં આટલા જ વર્ષની સજા થઈ છે. ઓફિશિયલ સિક્રેટ એક્ટ હેઠળ રચાયેલી વિશેષ અદાલતે બંને નેતાઓ વિરુદ્ધ આ નિર્ણય આપ્યો છે.

પાડોશી દેશમાં આ નિર્ણય એવા સમયે લેવાયો છે જ્યારે ત્યાં ૮ ફેબ્રુઆરી, ૨૦૨૪ના રોજ સામાન્ય ચૂંટણી યોજાવાની છે. આ ચૂંટણીમાં અનેક પડકારો વચ્ચે ઇમરાન ખાનની પાર્ટી ચોક્કસપણે પોતાની તમામ મહેનત કરી રહી છે. રસપ્રદ વાત એ છે કે હાલમાં તેમની પાસે ચૂંટણી ચિન્હ પણ નથી. વાસ્તવમાં, સાઇફર કેસ રાજદ્વારી દસ્તાવેજ સાથે સંબંધિત મામલો છે. ફેડરલ ઇન્વેસ્ટિગેશન એજન્સીની ચાર્જશીટમાં આરોપ છે કે ઇમરાન ખાને તેને ક્યારેય પરત કર્યું નથી, જ્યારે પીટીઆઇ લાંબા સમયથી કહેતી હતી કે તે દસ્તાવેજમાં અમેરિકા તરફથી એવી ધમકી હતી કે ઇમરાન ખાનને વઝીર-એ-આઝમ એટલે કે પીએમ તરીકે પાકિસ્તાન માંથી હાંકી કાઢવામાં આવશે.

આ પહેલા ડિસેમ્બર ૨૦૨૩માં દેશની સર્વોચ્ચ અદાલતે ઈમરાન ખાન અને શાહ મહમૂદ કુરેશીની ધરપકડ પછીના જામીન મંજૂર કર્યા હતા. આ સમયગાળા દરમિયાન, ભૂતપૂર્વ વડા પ્રધાન અન્ય કેસોમાં જેલમાં હતા, જ્યારે ભૂતપૂર્વ વિદેશ પ્રધાનની સંભવિત મુક્તિ પર પણ રોક મૂકવામાં આવી હતી. કારણ કે ૯ મેના રોજ અન્ય એક કેસમાં તેની ધરપકડ કરવામાં આવી હતી. હાલ બંને નેતાઓ જેલમાં છે.