જામનગરની એક મહિલા સામે ચેક રીટર્ન અંગેનો કેસ કરવામાં આવ્યો હતો, જે કેસ અદાલત સમક્ષ ચાલી જતાં અદાલતે મહિલા આરોપીને તકસીરવાન ઠેરવી, એક વર્ષની સજા તેમજ ચેકની બમણી રકમનો દંડ ફટકાર્યો છે.
જામનગરમાં રહેતી રૂપલબેન અનિલભાઈ પાટલીયા નામની મહિલાએ પોતાના પતિના મિત્ર એવા મહાવીર સિંહ પ્રભાતસિંહ સોઢા પાસેથી ૨,૧૫,૦૦૦ હાથ ઉછીના લીધા હતા, અને તેની સામે ચેક આપ્યો હતો. જે બેંકમાંથી નાણાં ના અભાવે પાછો ફર્યો હોવાથી અદાલતમાં ફરિયાદ દાખલ કરવામાં આવી હતી.
દરમિયાન ફરિયાદી અને આરોપી વચ્ચે સમાધાન થયું હતું અને કેટલીક રકમ ચૂકવ્યા બાદ ૧૦-૧૦ હજારના બે ચેક અપાયા હતા. જે બંને ચેક ફરીથી નાંણાના અભાવે પાછા ફરતાં મહિલા સામે જામનગરની અદાલતમાં ફરીથી ચેક રિટર્ન  અંગેની ફરિયાદ દાખલ કરવામાં આવી હતી. જે કેસ અદાલત ચાલી જતા અદાલતે મહિલા આરોપી રૂપલબેન પટેલ ને એક વર્ષની કેદની સજા અને ચેક ની બમણી રકમ ફરિયાદીને વળતર રૂપે ચૂકવી દેવા હુકમ થયો છે.