એટીએમમાંથી રોકડ ઉપાડવી હવે મોંઘી બનશે. કારણ કે રિઝર્વ બેંક ઓફ ઈન્ડિયા (RBI) પાંચ મફત વ્યવહારોની મર્યાદા ઓળંગવા માટે ચાર્જ અને ATM ઇન્ટરચેન્જ ફી વધારવાની તૈયારીમાં છે. આનો અર્થ એ થયો કે હવે ગ્રાહકોએ ATMમાંથી પૈસા ઉપાડવા માટે પોતાના ખિસ્સામાંથી વધુ ખર્ચ કરવો પડશે.

ચાર્જ કેટલો વધશે?
મળતી માહિતી મુજબ, નેશનલ પેમેન્ટ્સ કોર્પોરેશન ઓફ ઈન્ડિયા (NPCI)એ પાંચ વખત મફત મર્યાદા સમાપ્ત થયા પછી મહત્તમ રોકડ વ્યવહાર ફી વર્તમાન 21 રૂપિયાના સ્તરથી વધારીને 22 રૂપિયા કરવાની ભલામણ કરી છે. પેમેન્ટ રેગ્યુલેટર NPCIએ ઉદ્યોગ સાથે ચર્ચા કર્યા પછી રોકડ વ્યવહારો માટે ATM ઇન્ટરચેન્જ ફી 17 રૂપિયાથી વધારીને 19 રૂપિયા કરવાની ભલામણ પણ કરી છે.

ચોક્કસ મર્યાદા પછી બીજી બેંકના ATMમાંથી ઉપાડ પર ઇન્ટરચેન્જ ફી વસૂલવામાં આવે છે. એટલે કે, એટીએમ સેવાનો ઉપયોગ કરવાના બદલામાં એક બેંક દ્વારા બીજી બેંકને ચૂકવવામાં આવતી રકમ છે. એટીએમમાંથી ટ્રાન્ઝેક્શન કર્યા પછી બિલ પર પણ તેનો ઉલ્લેખ હોય છે.

આ અંગે RBIએ એક બેઠક યોજી 
રિપોર્ટ અનુસાર, બેંકો અને વ્હાઇટ-લેબલ એટીએમ ઓપરેટરો મેટ્રો અને નોન-મેટ્રો વિસ્તારોમાં ફી વધારવાની NPCIની યોજના સાથે સંમત છે. જોકે, ભારતીય રિઝર્વ બેંક અને NPCIએ હજુ સુધી આ વિષય પર કોઈ ટિપ્પણી કરી નથી.

RBIએ IBAના CEOની અધ્યક્ષતામાં બીજી સમિતિની રચના કરી, જેમાં SBI અને HDFC બેંકના અધિકારીઓનો સમાવેશ થતો હતો. આ બાબતથી પરિચિત વ્યક્તિએ જણાવ્યું હતું કે,
ખાનગી અને જાહેર ક્ષેત્રની બેંકો માટે ખર્ચનું મૂલ્યાંકન કર્યા પછી, અમે ગયા વર્ષે સપ્ટેમ્બરમાં આ ભલામણ કરી હતી. અમે કહ્યું હતું કે, NPCI ભલામણ રાખી શકાય છે, પરંતુ વાસ્તવિક મુદ્દો ગ્રામીણ અને અર્ધ-શહેરી વિસ્તારોમાં છે.

એટીએમ ચલાવવાનો ખર્ચ વધી રહ્યો છે
અહેવાલ મુજબ, છેલ્લા બે વર્ષમાં વધતા ફુગાવા અને ઉધાર ખર્ચમાં 1.5-2 ટકાનો વધારો, પરિવહન પરના ઊંચા ખર્ચ, રોકડ ભરપાઈ અને પાલન ખર્ચને કારણે નોન-મેટ્રો સ્થળોએ ATM કામગીરીનો ખર્ચ વધ્યો છે.