જેતપુર તાલુકાના થાણાગાલોળ ગામે બાઇક પર વાડીએ દંપતી જતું હતું ત્યારે બાઇક સ્લીપ થતાં દંપતી અકસ્માતે કેનાલમાં પડી ગયા હતાં. જેમાં પતિ કેનાલમાંથી બહાર નીકળી ગયો યારે પત્ની કેનાલના પાણીમાં ડૂબી જતાં તેણીનું મોત નીપયું હતું.થાણાગાલોળ ગામના ગોપાલભાઈ ઉંધાડ ઘણા વર્ષેાથી સુરત મુકામે હીરાનું કામ કરી ત્યાં જ પરીવાર સાથે વસવાટ કરે છે. હાલ તેઓ સુરતથી પોતાના ગામ થાણાગાલોળ મુકામે પત્ની રંજનબેન સાથે આવ્યા હતાં. જેમાં આજે તેઓ પત્ની રંજનબેન સાથે બાઇક પર પોતાની વાડીએ જતાં હતા. ત્યારે વાડીએ કેનાલ કાંઠે રોડ પરથી જવાતું હોય તેઓ ત્યાંથી પસાર થતા હતા ત્યારે કેનાલનો કાચો રોડ નાના પથ્થરોથી સાવ ભંગાર થઈ ગયો હોય આ પથ્થરો પરથી આ દંપતી પસાર થતું હતું ત્યારે તેનું બાઇક સ્લીપ થતા બંને કેનાલના પાણીમાં અકસ્માતે પડી ગયાં. જેમાં ગોપાલભાઈ તો જેમતેમ કરી પાણીમાંથી બહાર નીકળી ગયા પરંતુ રંજનબેન કેનાલના પાણીના પ્રવાહમાં તણાઈ ગયાં. રંજનબેન કેનાલમાં તણાયાની ગામમાં જાણ થતા જ ગામવાસીઓ તેમજ જેતપુર નગરપાલિકાની ફાયરની ટીમ ઘટના સ્થળે પહોંચી રંજનબેનની શોધખોળ હાથ ધરી હતી. બે કલાક બાદ જેતપુર થાણાગાલોર રોડ પાસેથી કેનાલના પાણીમાંથી રંજનબેન મળી આવતા તેણીને તરત જ સરકારી હોસ્પીટલ લઈ જવામાં આવ્યા. હોસ્પીટલે ફરજ પરના તબીબે તેણીને મૃત જાહેર કર્યા હતાં.