કરોડો રૂપિયાની કિંમતી જમીન પરનું દબાણ દૂર કરવા માંગ: ગૌસેવા સંસ્થા દ્વારા તંત્રને રજૂઆત

ખંભાળિયા શહેરની નજીકમાં આવેલી ગ્રામ પંચાયતોના વિસ્તારમાં સરકારની ગૌચરની જમીન પર અનેક સ્થળોએ ભૂમાફિયાઓ દ્વારા દબાણ આચરવામાં આવ્યું હોવાના આક્ષેપો સાથે આ અંગે ગૌસેવા સંસ્થા દ્વારા જિલ્લા કલેકટરને લેખિત પત્ર પાઠવવામાં આવ્યો છે.

ખંભાળિયા શહેર તથા આસપાસના વિસ્તારોમાં ખાસ કરીને ગૌવંશ સહિત અનેક પ્રકારના અબોલ પશુ-પક્ષીઓની નિયમિત રીતે સેવાઓ કરતી સંસ્થા એનીમલ કેર ચેરીટેબલ ટ્રસ્ટ દ્વારા અહીંના જિલ્લા કલેકટરને એક લેખિત પત્ર પાઠવીને આવેદનપત્ર આપવામાં આવ્યું છે. આ પત્રમાં જણાવાયા મુજબ ખંભાળિયા શહેરને સંલગ્ન આવેલી ધરમપુર, રામનગર, શક્તિનગર અને હર્ષદપુર ગ્રામ પંચાયત વિસ્તારમાં અનેક શખ્સો દ્વારા ગૌચરની જમીનને વણાંકી લેવામાં આવી છે. ત્યારે આ પ્રકારનું જમીન દબાણ તાકીદે દૂર કરાવી અને ગૌચરની આ જગ્યા ગૌવંશ માટે ખુલ્લી કરાવવામાં આવે તેવી માંગ આ પત્રમાં કરવામાં આવી છે.

કરોડો રૂપિયાની કિંમતી મનાતી આ જમીન પર દબાણ હટાવવામાં આવે તેવી રજૂઆત સંસ્થાના પ્રમુખ દેશુરભાઈ ધમા દ્વારા કરાઈ છે. સાથે પત્રની નકલ રાજ્યના મુખ્યમંત્રી તેમજ ગૃહમંત્રીને પણ મોકલવામાં આવી છે.