વાંકાનેર શહેરમાં અમુક વિસ્તારોમાં છેલ્લા કેટલાક સમયથી અનિયમીત પાણી વિતરણની ફરિયાદ ઉઠી છે ત્યારે શહેરના વોર્ડ નં.૫માં પ્રતાપ ચોક વિસ્તારમાં છેલ્લા ૪ દિવસથી પાણી વિતરણ કરવામાં ન આવતા મહિલાઓ અકળાઈ ઉઠી હતી અને ખાલી બેડા લઈ શેરીઓમાં દેખાવો કર્યા હતા. 

શહેરના વોર્ડ નં.૫ પ્રતાપ ચોક અને આસપાસના વિસ્તારોમાં કાળા ઉનાળામાં ચાર દિવસથી પાણી વિતરણ કરવામાં આવેલ નથી જેના કારણે રોષ ફેલાયો હતો. પાલિકા કચેરીએ ટેલીફોનીક દ્વારા ફરિયાદ કરવામાં આવતા ઉધ્ધતાઈભર્યા જવાબો આપતા હોવાના આક્ષેપ મહિલાઓ દ્વારા કરવામાં આવેલ છે. 

મહિલાઓએ આ તકે જણાવ્યું હતું કે, વાંકાનેર શહેરને પાણી પુ‚ પાડતા મચ્છુ-૧માં પુરતું પાણી હોવા છતાં ભરઉનાળે પાણી કાપ શા માટે ? આસપાસના વિસ્તારોમાં નિયમીત પાણી અપાય છે તો આ વિસ્તારના પ્રજાજનો સાથે પાલિકા તંત્ર કેમ ઓરમાયું વર્તન કરે છે ? વિસ્તારમાં નિયમીત પાણી વિતરણ કરવા ચીફ ઓફિસરને વિનંતી કરવામાં આવી હતી. હાલ ધોમધખતા તાપમાં પાણી માટે વલખા મારવા પડે છે ત્યારે પાણી વિતરણ નિયમીત કરવા માંગ કરવામાં આવી છે.