સંસદની નવી ઇમારતની અંદર પાણી લીકેજ જોવા મળી રહ્યું છે. જેનો વિડીયો તમિલનાડુની વિરુધુનગર લોકસભા બેઠકના કોંગ્રેસના સાંસદ મણિકમ ટાગોર દ્વારા સોશિયલ મીડિયા પર પોસ્ટ કરવામાં આવ્યો છે. વીડિયોમાં જોઈ શકાય છે કે છતમાંથી પાણી લીક થઈ રહ્યું છે અને નીચે પડતા પાણીને ફેલાતા અટકાવવા માટે ફ્લોર પર ડોલ મુકવામાં આવી છે.
કોંગ્રેસ નેતાએ સોશિયલ મીડિયામાં લખ્યું કે બહાર પેપર લીકેજ, અંદર પાણી લીકેજ. રાષ્ટ્રપતિ દ્વારા ઉપયોગમાં લેવાતા સંસદની લોબીમાં તાજેતરનું પાણી લીકેજ, નવી ઇમારતમાં સમસ્યાઓને પ્રકાશિત કરે છે. આ મુદ્દા પર લોકસભામાં સ્થગિત દરખાસ્ત રજૂ કરવામાં આવી હતી.
સમાજવાદી પાર્ટીના વડા અને ઉત્તર પ્રદેશના પૂર્વ મુખ્યમંત્રી અખિલેશ યાદવે સોશિયલ મીડિયા પોસ્ટમાં કહ્યું, જૂની સંસદ આ નવી સંસદ કરતાં સારી હતી, જ્યાં સુધી અબજો રૂપિયાથી બનેલી સંસદમાં પાણી ટપકવાનો કાર્યક્રમ ચાલે છે ત્યાં સુધી આપણે જૂની સંસદમાં બેસવું જોઈએ. અખિલેશે વધુમાં કહ્યું કે જનતા પૂછી રહી છે કે ભાજપ સરકાર હેઠળ બનેલી દરેક નવી છતમાંથી પાણી ટપકવું એ તેમની ડીઝાઇન છે કે શું?