બજેટ સત્રના પાંચમા દિવસે અમેરિકાથી ભારતીયોને દેશનિકાલ કરવાના મુદ્દા પર સંસદમાં હોબાળો થયો છે. સવારે 11 વાગ્યે કાર્યવાહી શરૂ થતાં જ વિપક્ષે આ મુદ્દા પર ચર્ચાની માંગ કરી છે. વિપક્ષી સાંસદોએ 'સરકાર શરમ કરો' ના નારા લગાવ્યા હતા.

રાજ્યસભામાં પણ હોબાળો થયો 
લોકસભા સ્પીકર ઓમ બિરલાએ કહ્યું- સરકાર તમારી ચિંતાથી વાકેફ છે. આ વિદેશ નીતિનો મુદ્દો છે. રાજ્યસભામાં પણ હોબાળો થયો હતો. લોકસભાની કાર્યવાહી પહેલા બપોરે 12 વાગ્યા સુધી અને પછી 2 વાગ્યા સુધી સ્થગિત કરવામાં આવી છે.

આ માનવ અધિકારોનું ઉલ્લંઘન છે
લોકસભામાં કોંગ્રેસના સાંસદ મણિકમ ટાગોરે પણ ભારતીય નાગરિકોને અમેરિકામાંથી દેશનિકાલ કરવા અંગે ચર્ચા કરવા માટે સ્થગિત કરવાની નોટિસ આપી હતી. ટાગોરે પોતાની નોટિસમાં કહ્યું કે, અમેરિકામાંથી 100થી વધુ ભારતીયોને હાંકી કાઢવાથી સમગ્ર દેશ આઘાતમાં છે. આ માનવ અધિકારોનું ઉલ્લંઘન છે. સરકાર આ અંગે ચૂપ કેમ છે? ભારતે આ અમાનવીય વર્તનની નિંદા કેમ ન કરી?

આ સત્રમાં 16 બિલ રજૂ થઈ શકે છે
સંસદનું બજેટ સત્ર શુક્રવાર 31 જાન્યુઆરીથી શરૂ થયું હતું. પહેલું સત્ર 31 જાન્યુઆરીથી 13 ફેબ્રુઆરી સુધી અને બીજું સત્ર 10 માર્ચથી 14 એપ્રિલ સુધી ચાલશે. આ સત્રમાં 16 બિલ રજૂ થઈ શકે છે. જેમાંથી 12 બિલ 2024ના ચોમાસા અને શિયાળુ સત્રમાં રજૂ કરવામાં આવ્યા હતા. દિલ્હી વિધાનસભા ચૂંટણી માટે મતદાનને કારણે ગઈકાલે ગૃહની કાર્યવાહી સ્થગિત કરવામાં આવી હતી.

દેશનિકાલ પહેલીવાર નથી થયોઃ શશિ થરૂર 
શશિ થરૂરે જણાવ્યું હતું કે, આ પહેલીવાર નથી જ્યારે આપણા લોકોને દેશનિકાલ કરવામાં આવ્યા હોય. લોકોની અપેક્ષા કરતાં ટ્રમ્પે તે થોડું વહેલું કર્યું હોવાથી હવે ચર્ચા થઈ રહી છે. પરંતુ ગયા વર્ષે જ બાઇડન વહીવટ હેઠળ 1,100થી વધુ ભારતીયોને દેશનિકાલ કરવામાં આવ્યા હતા. જો તમે ગેરકાયદેસર રીતે અમેરિકામાં છો, તો અમેરિકાને તમને હાંકી કાઢવાનો અધિકાર છે અને જો તમારી ભારતીય તરીકેની ઓળખ પુષ્ટિ થાય છે તો ભારતની જવાબદારી છે કે તે તમને સ્વીકારે.  આથી, આ અંગે વધુ ચર્ચા ન થવી જોઈએ. આ સાંભળવું થોડું અટપટું છે કે તેમને બળજબરીથી લશ્કરી વિમાનમાં પાછા લાવવામાં આવ્યા અને હથકડી પહેરાવવામાં આવી. આની કોઈ જરૂર નહોતી. તેમને કોમર્શિયલ ફ્લાઇટમાં પાછા મોકલવા જોઈતા હતા.