મહાકુંભ દર ૧૨મા વર્ષે યોજાય છે પરંતુ આ વખતે ૧૪૪ વર્ષના સંયોગને કારણે ઉત્તર પ્રદેશના પ્રયાગરાજના ત્રિવેણી સંગમમાં ભક્તોની ભારે ભીડ ઉમટી રહી છે. એવું માનવામાં આવે છે કે ત્રિવેણી સંગમ કિનારે પવિત્ર સ્નાન કરવાથી પુણ્ય પ્રાપ્ત થાય છે. જોકે, ઘણા લોકો એવા છે જે ઈચ્છવા છતાં મહા કુંભમાં જઈ શકતા નથી. આવા લોકોને આકર્ષવા માટે જાહેરાતો દ્વારા તેમને એક 'ખાસ સેવા' ઓફર કરવામાં આવી છે, જેનાથી સોશિયલ મીડિયા પર એક નવી ચર્ચા શરૂ થઈ છે.

વાયરલ જાહેરાતના ફોટા મુજબ આ ૧૪૪ વર્ષમાં એકવાર મળતી તક છે! દિવ્ય મહાકુંભ સ્નાન કરવાની આ તમારી છેલ્લી તક છે. તેને ચૂકશો નહીં. આ નંબર પર તમારો ફોટો અમને વોટ્સએપ કરો, અમે તેની ફોટોકોપી લઈશું અને તમારા ફોટા સાથે પવિત્ર જળમાં ડૂબકી લગાવીશું.

જાહેરાત અહીં પૂરી નથી થતી. ફાયદાઓની યાદી આપતાં લખ્યું છે કે આ ફક્ત તમારા આત્માને જ શુદ્ધ નહીં કરે પરંતુ દૈવી આશીર્વાદ પ્રાપ્ત થશે. ઉપરાંત, તમારા પૂર્વજો પણ તમને મહાકુંભમાં ડૂબકી લગાવવા બદલ આશીર્વાદ આપશે.

જાહેરાતના અંતે લખ્યું છે. આ ક્ષણ તમારા જીવનમાં ફરી નહીં આવે. તેથી પવિત્ર સ્નાન કરો અને માત્ર 500 રૂપિયામાં પુણ્ય કમાઓ. હવે નેટીઝન્સ આ જાહેરાત પર ખૂબ મજા કરી રહ્યા છે. વ્યવસાયે વકીલ સંજય હેગડેએ લખ્યું કે જો હું તમને 500 રૂપિયાની ફોટોકોપી મોકલીશ તો સારું રહેશે.

એક યુઝરે ટિપ્પણી કરી કે આ લોકો તમને ડૂબકી લગાવતા તમારા AI જનરેટેડ ફોટા મોકલશે. બીજા એક યુઝરે મજાક ઉડાવી કે  ભાઈ, મુક્તિ પણ ડિજિટલી જ મળશે. અન્ય એક યુઝરે કહ્યું કે  આ ફક્ત ભારતમાં જ થઈ શકે.