​​​​​​​ગગનયાન માટે ભારતીય વાયુસેનાના ચાર અવકાશયાત્રીઓમાંથી એકને ટૂંક સમયમાં નાસામાં મોકલવામાં આવશે. જેથી તે સ્પેસ સ્ટેશન પર જવા માટે ટ્રેનિંગ લઈ શકે. કેન્દ્રીય મંત્રી ડો.જિતેન્દ્ર સિંહે લોકસભામાં આ વાત જણાવી. મંત્રીએ કહ્યું કે ISRO નાસા સાથે સંયુક્ત મિશન માટે સતત તૈયારી કરી રહ્યું છે.

ગગનયાત્રીને ઈન્ટરનેશનલ સ્પેસ સ્ટેશન (ISS) પર કેવી રીતે મોકલી શકાય તેના પર ઈસરો નજર રાખી રહ્યું છે. આ નાસા અને ઈસરોનું સંયુક્ત મિશન હશે. ડો.જિતેન્દ્ર સિંહે જણાવ્યું કે ગગનયાન માટે જે ચાર ગગનયાત્રીઓને તાલીમ આપવામાં આવી રહી છે તેમાંથી એક નાસામાં તાલીમ લેશે. ત્યારબાદ સ્પેસ સ્ટેશન જશે.

નાસાએ સ્પેસ સ્ટેશન મોકલવા માટે ખાનગી કંપની AXIOM સ્પેસની પસંદગી કરી છે. ભારતીય અવકાશયાત્રી આ વાહનમાં સ્પેસ સ્ટેશન પહોંચશે. ISROએ નાસાની હાજરીમાં આ માટે Axiom Space સાથે ડીલ કરી છે. આ Axiom-4 મિશન હશે. આ ઈન્ટરનેશનલ સ્પેસ સ્ટેશનનું ખાનગી મિશન હશે.

ભારતીય અવકાશયાત્રીને ઓગસ્ટમાં સ્પેસ સ્ટેશન પર મોકલવામાં આવશે

સંભવતઃ આ મિશન ઓગસ્ટ 2024 કે પછી ફ્લોરિડામાં કેનેડી સ્પેસ સેન્ટરથી લોન્ચ કરવામાં આવશે. હાલમાં ગગનયાનના ચાર અવકાશયાત્રીઓને ISRO એસ્ટ્રોનોટ્સ ટ્રેનિંગ ફેસિલિટી (ATF)માં તાલીમ આપવામાં આવી રહી છે. આ પહેલા આ અવકાશયાત્રીઓએ રશિયામાં તેમની મૂળભૂત તાલીમ પૂર્ણ કરી હતી. અવકાશયાત્રી તાલીમના ત્રણ સેમેસ્ટરમાંથી બે સેમેસ્ટર પૂર્ણ થયા છે.

જાણો કોણ છે તે અવકાશયાત્રીઓ, જેમાંથી એક ISSમાં જશે

ગ્રુપ કેપ્ટન પ્રશાંત બાલકૃષ્ણન નાયર

પ્રશાંત નાયરનો જન્મ 26 ઓગસ્ટ 1976ના રોજ કેરળના તિરુવાઝિયાદમાં થયો હતો. એનડીએમાં તાલીમ પૂર્ણ કરી. એરફોર્સ એકેડેમી તરફથી સ્વોર્ડ ઓફ ઓનર મેળવ્યું. 19 ડિસેમ્બર 1998ના રોજ તેમને વાયુસેનાના ફાઈટર જેટ પ્રોગ્રામમાં સામેલ કરવામાં આવ્યા અને ફાઈટર પાઈલટ બનાવ્યા હતા. તે CAT-A ક્લાસ ફ્લાઈંગ ઈન્સ્ટ્રક્ટર અને ટેસ્ટ પાઈલટ છે. લગભગ 3000 કલાક ઉડવાનો અનુભવ ધરાવે છે.

પ્રશાંત નાયરે Su-30MKI, MiG-21, MiG-29, Hawk, Dornier, AN-32 વગેરે જેવા વિમાનો ઉડાવ્યા છે. તેઓ યુનાઈટેડ સ્ટેટ્સ સ્ટાફ કોલેજ, DSSC, વેલિંગ્ટન અને FIS, તાંબરમના ભૂતપૂર્વ વિદ્યાર્થી પણ છે. તે સુખોઈ-30 સ્ક્વોડ્રનના કમાન્ડન્ટ પણ રહી ચૂક્યા છે.

ગ્રુપ કેપ્ટન અજીત કૃષ્ણન

તામિલનાડુના ચેન્નાઈમાં 19 એપ્રિલ 1982ના રોજ જન્મેલા અજિતે એનડીએમાંથી આર્મી ટ્રેનિંગ પૂર્ણ કરી છે. રાષ્ટ્રપતિ તરફથી ગોલ્ડ મેડલ અને એરફોર્સ એકેડમી તરફથી સ્વોર્ડ ઓફ ઓનર મેળવ્યું છે. 21 જૂન 2003ના રોજ તેમને ભારતીય વાયુસેનાના ફાઇટર સ્ટ્રીમમાં સામેલ કરવામાં આવ્યા હતા. તેમની પાસે ફ્લાઈંગ ઈન્સ્ટ્રક્ટર અને ટેસ્ટ પાઈલટ તરીકે 2900 કલાકનો અનુભવ છે. અજિતે Su-30MKI, MiG-21, Mig-21 Bison, Mig-19, JugR, Dornier, An-32 જેવા વિમાનો ઉડાવ્યા છે. તે DSSC વેલિંગ્ટનના ભૂતપૂર્વ વિદ્યાર્થી છે.

ગ્રુપ કેપ્ટન અંગદ પ્રતાપ

ઉત્તર પ્રદેશના પ્રયાગરાજમાં 17 જુલાઈ 1982ના રોજ જન્મેલા અંગદ પ્રતાપે એનડીએમાં લશ્કરી તાલીમ મેળવી હતી. 18 ડિસેમ્બર 2004ના રોજ  તેમને એરફોર્સના ફાઇટર સ્ટ્રીમમાં સામેલ કરવામાં આવ્યા હતા. તેમની પાસે ફ્લાઈંગ ઈન્સ્ટ્રક્ટર અને ટેસ્ટ પાઈલટ તરીકે લગભગ 2000 કલાકનો અનુભવ છે. અંગદે સુખોઈ-30એમકેઆઈ, મિગ-21, મિગ-29, જગુઆર, હોક, ડોર્નિયર અને એન-32 જેવા વિમાનો અને ફાઈટર જેટ્સ ઉડાવ્યા છે.

વિંગ કમાન્ડર શુભાંશુ શુક્લા

10 ઓક્ટોબર 1085ના રોજ લખનૌમાં જન્મેલા શુભાંશુએ NDAમાં લશ્કરી તાલીમ લીધી હતી. તેમને 17 જૂન 2006ના રોજ એરફોર્સના ફાઇટર સ્ટ્રીમમાં સામેલ કરવામાં આવ્યા હતા. તે ફાઇટર કોમ્બેટ લીડર અને ટેસ્ટ પાઇલટ પણ છે. તેની પાસે 2000 કલાકનો ઉડાનનો અનુભવ છે. તેણે સુખોઈ-30એમકેઆઈ, મિગ-21, મિગ-29, જગુઆર, હોક, ડોર્નિયર, એન-32 જેવા વિમાનો અને ફાઈટર જેટ્સ ઉડાવ્યા છે.