રાજકોટમાં વહેલી સવારે જ અરેરાટી મચી જાય તેવી ઘટના બની છે. શહેરના ગોંડલ રોડ પર માલધારી ફાટક પાસે ટ્રેનની ઠોકરે સાળા-બનેવી કપાઇ જતા બન્નેના કમકમાટીભર્યા મોત નીપજ્યા છે. ઘટનાને પગલે પોલીસ દોડી ગઈ છે અને તપાસ હાથ ધરી છે. 

સાળાએ કાનમાં હેન્ડ્સ ફ્રી ભરાવી હતી
પ્રાપ્ત વિગત મુજબ, રાજકોટના ગોંડલ રોડ પર માલધારી ફાટક પાસે કાનમાં હેન્ડ્સ ફ્રી ભરાવીને જઈ રહેલા સાળા બાબુ હરિદંર સોનકર (ઉં.12)ને બચાવવા જતા બનેવી અંગુ સોનકર (ઉં.28) પણ ટ્રેનની ઠોકરે ચડ્યા હતા. બન્ને ટ્રેનની અડફેટે કપાઇ જતા કમકમાટીભર્યા મોત નીપજ્યા હતા. 

જે સ્થળે બન્નેએ સાથે ફોટા પાડ્યા હતા ત્યાં જ બન્નેના મોત
સાળા-બનેવીએ થોડા દિવસ પહેલા જે રેલવે ટ્રેક પર બન્નેએ ફોટા પાડ્યા હતા ત્યાં જ બન્નેના ટ્રેનની અડફેટે કપાઇ જતા કરૂણાંતિકા સર્જાઇ છે. સાળા-બનેવીના મોતથી પરિવાર પર આભ ફાટ્યું હોય તેવો માહોલ સર્જાયો છે. પોલીસે બન્નેના મૃતદેહને પીએમ માટે સિવિલ હોસ્પિટલ ખસેડ્યા છે.