ગોંડલના મહિકા ગામે કૂવામાં પડી જતા બે પરપ્રાંતિય બાળકોના મોત

ગોંડલ તાલુકાના નાના મહિકા ગામે કૂવામાં પડી જતા બે પરપ્રાંતિય બાળકોના મોત થયા છે. નાના મહિકા ગામે મધ્યપ્રદેશના દેવાસ જિલ્લાના ખેડખાલ ગામેથી મજૂરી કરવા આવેલ પરિવાર અકસ્માતનો ભોગ બન્યો છે.

ધીરૂભાઈ પોપટભાઈ વેકરીયાની વાડીએ મજૂરી કરવા આવેલ પરપ્રાંતિય પરિવારના બે બાળકો 60 ફૂટ ઉંડા કૂવામાં પડી જતા તેના મોત નીપજ્યા છે.  બંન્ને મૃતક બાળકો રીતિક ધર્મેન્દ્રભાઈ જાદવ ઉ.વ.4 અને અશ્ર્વિન ધર્મેન્દ્રભાઈ જાદવ ઉ.વ.2 સગાભાઈ હતા.

પ્રાથમિક વિગતો મુજબ બન્ને સગાભાઈઓ રમતા રમતા કૂવામાં પડ્યા હોવાના અહેવાલો પ્રાપ્ત થયા છે. એકના મૃતદેહને તેમના પિતાએ અને બીજાના મૃતદેહને ગોંડલ નગરપાલિકા ફાયરબ્રિગેડની ટીમએ બહાર કાઢ્યા હતા.

પરપ્રાંતિય બંને બાળકોના મૃતદેહને શિવમ સાર્વજનિક ટ્રસ્ટની એમ્બ્યુલન્સ મારફત ગોંડલ સરકારી હોસ્પિટલમાં પીએમ અર્થે ખસેડવામાં આવ્યા છે પરપ્રાંતિય બે બે બાળકોના મોતને લઈને ખેત મજૂર પરિવારમાં ગમગીની છવાઈ હતી. સમગ્ર ઘટનાને લઈને ગોંડલ તાલુકા પોલીસે વધુ તપાસ હાથ ધરી છે