જસદણ તાલુકાના કનેસરા ગામે રહેતા અને અહીં ગામમાં જ પાનની દુકાન ચલાવતા યુવાનને તેના કુટુંબી ભાઇ સહિત બે શખસોએ હથોડી અને સળિયા વડે મારમાર્યો હતો.યુવાનને બચાવવા તેની બહેન વચ્ચે પડતા તેને પણ હથોડીનો ઘા મારી દીધો હતો.યુવાને ઉધારમા માલ આપવાનો ઇનકાર કરતા તેનો ખાર રાખી આ હુમલો કર્યો હતો.આ અંગે યુવાનની ફરિયાદ પરથી ભાડલા પોલીસે બે શખસો સામે ગુનો નોંધી કાયદેસરની કાર્યવાહી કરી હતી.
બનાવની જાણવા મળતી વિગતો મુજબ,જસદણ તાલુકાના કનેસરા ગામે રહેતા ભાવેશ વિહાભાઇ રાઠોડ(ઉ.વ 25) નામના યુવાને ભાડલા પોલીસ મથકમાં નોંધાવેલી ફરિયાદમાં આરોપી તરીકે ગોરધન ગાડુભાઇ રાઠોડ અને કાળુ સુરાભાઇ કુકડીયાના નામ આપ્યા છે.યુવાને ફરિયાદમાં જણાવ્યું હતું કે તે અહીં ગામમાં ચામુંડા પાનની દુકાન ચલાવી પરિવારનું ગુજરાન ચલાવે છે.
ગઇકાલે સવારના યુવાને દુકાન ખોલ્યા બાદ છ વાગ્યા આસપાસ કુટુંબી ભાઇ ગોરધન આવ્યો હતો અને તેણે બીડીની ઝુડી માંગી રૂ.20 આપ્યા હતાં.જેથી યુવાને કહ્યું હતું કે બીડી ઝુડી 25 રૂપિયાની આવે છે જેથી તેણે બાકીના પૈસા ઉધાર રાખવા કહ્યું હતું.બાદમાં માથાકૂટ કરી હતી જેથી યુવાને કહ્યું હતું કે તમારે અહીં કોઇ વસ્તુ લેવા આવવું નહીં.જેથી ગોરધન જતો રહ્યો હતો.બાદમાં સાંજના પાંચ વાગ્યે ગોરધન અને કાળુ બંને અહીં આવ્ય હતાં.ગોરધનમાં હાથમાં હથોડી હોય અને કાળુના હાથમાં સળિયો હતો.યુવાનને કહ્યું હતું કે દુકાનની બહાર નીકળ તેમ કહી તેને હથોડીના બે ઘા મારી દીધા હતાં. તેમજ કાળુએ સળિયાનો ઘા મારી દીધો હતો.યુવાને બુમાબુમ કરતા તેની બહેન મનિષા ઉર્ફે પુરી બચાવવા આવતા તેને પણ હથોડીનો ઘા મારી દીધો હતો.હુમલામાં ઘવાયેલા યુવાનને સારવાર માટે હોસ્પિટલ ખસેડવામાં આવ્યો હતો.બનાવ અંગે યુવાનની ફરિયાદ પરથી પોલીસે ભાડલા પોલીસે ગુનો નોંધી જરૂરી કાર્યવાહી કરી હતી.