આજે સવારે ઘુમ્મસની અસર વિમાન સેવા ઉપર પણ પડી હતી.રાજકોટ હિરાસર ઇન્ટરનેશનલ એરપોર્ટ પર આવતી ફ્લાઇટઓને વિઝિબ્લિટી ડાઉન હોવાથી લેન્ડિંગ કરી શકી નહતી જેના કારણે ફ્લાઇટને અમદાવાદ ડાઇવર્ટ કરવામાં આવતા બે થી ત્રણ કલાકનો વધુ સમય લાગતા પેસેન્જરમાં કચવાટ જોવા મળ્યો હતો.

છેલ્લા કેટલાક દિવસથી રાજકોટ સહીત રાજ્યના વાતાવરણમાં ગરમીની અસર જોવા મળ્યા બાદ આજે ફરીથી વહેલી સવારે ઝાકળ અને ગુલાબી ઠંડીનો અહેસાસ લોકોને થયો હતો. વાતાવરણની અસર માત્ર જનજીવનને જ નહીં પરંતુ હવાઈ સેવામાં પણ જોવા મળી હતી. આજે વહેલી સવારે ધુમ્મસના કારણે કારણે હિરાસર એરપોર્ટ પર આવતી મુંબઈની બે એર ઇન્ડિયાની ફ્લાઇટ વિઝિબ્લિટી ડાઉન હોવાથી લેન્ડિગ થઇ શકી નહતી. આથી એરપોર્ટ ઓથોરિટી દ્વારા અમદાવાદ ડાયવર્ટ કરવાનું નક્કી કરવામાં આવતા બંને ફલાઇટો ચક્કર લગાવી અમદાવાદ ડાયવર્ટ કરવામાં આવી હતી. વાતાવરણમાં સુધારો થયા બાદ ફ્લાઇટ રાજકોટ એરપોર્ટ પર લેન્ડિગ થઇ હતી. ખરાબ હવામાનના કારણે બે થી ત્રણ કલાક ફ્લાઇટ લેટ થતા મુસાફરોને પણ ના છૂટકે પ્લેનમાં જ બેસી રહેવું પડ્યું હતું. બંને ફ્લાઇટ મોડી લેન્ડિંગ થવાથી ઉડાન ભરવાના સમયમાં પણ ફેરફાર થતા રાજકોટથી જતા મુસાફરોને પણ એરપોર્ટ પર રાહ જોવાની ફરજ પડી હતી. જેના કારણે મુસાફરોમાં કચવાટ જોવા મળ્યો હતો.