પરપ્રાંતિય દંપતીએ CWC કમિટીનો આભાર વ્યક્ત કર્યો

ઓખાના રેલવે સ્ટેશન ખાતેથી તાજેતરમાં રેલવે પોલીસને બે નાના બાળકો મળી આવ્યા હતા. અંદાજિત 6 વર્ષ તથા 10 વર્ષની ઉંમરના એવા આ બંને બાળક એકલા હોય અને આ બંનેના કોઈ વાલી-વારસ સાથે ન જણાતા રેલવે પોલીસે આ બંને બાળકો અંગે ખંભાળિયા ચાઈલ્ડ વેલ્ફેર કમિટીનો સંપર્ક કર્યો હતો. જેને અનુલક્ષીને સંસ્થા દ્વારા આ બાળકોને ખંભાળિયાની સી.સી.આઈ. સંસ્થામાં રાખવા માટેનું જણાવ્યું હતું.

આ બંને બાળકોનું કાઉન્સિલિંગ કરાતા તેઓના માતા-પિતા ઝારખંડ ના મૂળ રહીશ હોવાનું અને હાલ જામનગરમાં રેલવે સ્ટેશનની બાજુમાં રહેતા હોય આ અંગે સી.ડબલ્યુ.સી.ના ચેરમેન ચંદ્રશેખર બુધ્ધભટ્ટીએ જામનગર રેલવે પોલીસનો સંપર્ક કર્યો હતો અને આ સમગ્ર બાબતે જાણ કરી હતી. આ પછી બાળકોના માતા-પિતા અંગેની શોધખોળમાં બંને બાળકોના માતા-પિતા જામનગરથી મળી આવ્યા હતા.

આ બંને બાળકો તથા માતા-પિતાના જરૂરી દસ્તાવેજોની ચકાસણી કરી અને બંને બાળકોનો કબજો તેના માતા-પિતાને સોંપવામાં આવ્યો હતો. આથી આ દંપતીએ ભાવવિભોર થઈ અને કમિટીનો આભાર વ્યક્ત કર્યો હતો.