અમેરિકાના રાષ્ટ્રપતિ ડોનાલ્ડ ટ્રમ્પે સેંકડો ઇમિગ્રન્ટ્સને અલ સાલ્વાડોર દેશનિકાલ કર્યા છે. ટ્રમ્પ વહીવટીતંત્રનો આ નિર્ણય યુએસ ફેડરલ કોર્ટના ન્યાયાધીશે વિદેશી દુશ્મન કાયદા હેઠળ દેશનિકાલ પર અસ્થાયી રૂપે રોક લગાવવાનો આદેશ જારી કર્યા બાદ આવ્યો છે. કોર્ટના નિર્ણય પછી લેવામાં આવેલા પગલાંનો બચાવ કરતા, ટ્રમ્પ વહીવટીતંત્રના અધિકારીઓએ કહ્યું કે કોર્ટ પોતાનો નિર્ણય સંભળાવી રહી હતી ત્યાં સુધીમાં આ વ્યક્તિઓને લઈ જતા વિમાનો ઉડાન ભરી ચૂક્યા હતા.

અહેવાલ મુજબ, યુએસ ડિસ્ટ્રિક્ટ જજ જેમ્સ ઇ. બોસબર્ગે દેશનિકાલને અસ્થાયી રૂપે રોકવાનો આદેશ જારી કર્યો. ટ્રમ્પ વહીવટીતંત્રનું પ્રતિનિધિત્વ કરતા વકીલોએ તેમને કહ્યું હતું કે ઇમિગ્રન્ટ્સને લઈ જતા બે વિમાનો પહેલાથી જ ઉડાન ભરી ચૂક્યા છે. આમાંથી એક અલ સાલ્વાડોર જઈ રહ્યું છે, જ્યારે બીજું હોન્ડુરાસ તરફ જઈ રહ્યું છે.

વિમાનો ઉડાન ભર્યાની માહિતી મળતા જ ન્યાયાધીશે મૌખિક રીતે તેમને પાછા લાવવાનો આદેશ આપ્યો. પરંતુ હવે જ્યારે વિમાનો અલ સાલ્વાડોર અને હોન્ડુરાસ પહોંચી ગયા છે, તો સ્પષ્ટ છે કે અધિકારીઓએ તેમના મૌખિક આદેશોનું પાલન કર્યું ન હતું.

વ્હાઇટ હાઉસના પ્રેસ સેક્રેટરી કેરોલિન લેવિટ વહીવટીતંત્રે કોર્ટના આદેશનું ઉલ્લંઘન કર્યું હોવાના આરોપોનો જવાબ આપ્યો હતો . તેમણે કહ્યું કે વહીવટીતંત્રે કોર્ટના આદેશનું પાલન કરવાનો ઇનકાર કર્યો નથી. જોકે, આ આદેશનો કોઈ કાનૂની આધાર નથી. ન્યાયાધીશે આ આદેશ આપ્યો ત્યાં સુધીમાં વિમાનો ઉડાન ભરી ચૂક્યા હતા.

ટ્રમ્પ પ્રશાસનના આ નિર્ણય અંગે નિષ્ણાતોના અલગ અલગ મંતવ્યો છે. જ્યોર્જટાઉન યુનિવર્સિટી લો સેન્ટરના પ્રોફેસર સ્ટીવ વ્લાડેકે જણાવ્યું હતું કે બોઆસબર્ગે જે આદેશ જારી કર્યો હતો તેમાં વિમાનો પાછા લાવવાનો ઉલ્લેખ નહોતો, પરંતુ તેમણે મૌખિક રીતે કહ્યું હતું. ટ્રમ્પ વહીવટીતંત્ર કાયદેસર રીતે ન્યાયી હોઈ શકે છે, પરંતુ એ ચોક્કસ છે કે તેમણે ન્યાયાધીશના નિર્ણયની ભાવનાનું ઉલ્લંઘન કર્યું છે.વ્લાડેકે કહ્યું કે આ ઘટના પછી, અદાલતો તેમના ભવિષ્યના આદેશોમાં વધુ સ્પષ્ટ રહેશે અને સરકારને કોઈપણ છૂટછાટ આપતા પહેલા વિચાર કરશે.