દમણથી દ્વારકા જતો દારુ ભરેલો ટ્રક પકડાયો: રૂા. ૪૬.૧૨ લાખનો મુદામાલ જપ્તઃ બે ફરાર

May 20, 2025 01:21 PM

મીનરલ વોટરની આડમાં દારુ-બિયરનો જથ્થો છુપાવ્યો : ધંધુકા-લીમડી ત્રણ રસ્તા પાસે પોલીસ પ્રગટી

દમણથી દારૂ-બિયરનો જથ્થો ભરીને દ્વારકા તરફ રવાના થયેલો ટ્રક નિયત સ્થળે પહોચે એ પહેલા લીમડી ત્રણ રસ્તા પર પોલીસ ત્રાટકી હતી અને કુલ રૂા. ૪૬.૧૨ લાખનો મુદામાલ સાથે ટ્રકચાલકને પકડી લીધો હતો, જથ્થો મંગાવનાર અને મોકલનારના નામ ખુલ્યા છે, મીનરલ વોટરની આડમાં આ દારૂ લઇ જવામાં આવી રહયો હતો.

ધંધુકા પોલીસને બાતમી મળી હતી કે, ફેદરાથી ધંધુકા તરફ આવી રહેલા ટ્રકમાં મિનરલ વોટરની આડમાં વિદેશી દારૂ-બિયરનો મસમોટો જથ્થો સંતાડવમાં આવ્યો છે, જે બાતમીના આધારે ધંધુકા પોલીસ વોચમાં હતી ત્યારે ધંધુકાના લીમડી ત્રણ રસ્તા પાસે પોલીસે બાતમીવાળા ટ્રક નંબરઃ જીજે-૨૫-ટી-૯૪૫૯ ને શંકાના આધારે અટકાવ્યો હતો અને તેમા તપાસ કરતા ટ્રકમાં મિનરલ વોટરની બોટલના કેરેટ નીચે છુપાવેલી વિદેશી દારૂની મોટી ૯૬૦ બોટલ, નાની ૫૧૮૮૪ તથા પ્લાસ્ટીકની નાની ૪૩૬૮ બોટલો મળી આવી હતી.

આ ઉપરાંત તેની સાથે બિયરની ૧૬૩૨ બોટલ મળી કુલ રૂા. ૩૯,૩૯,૮૪૦ ની કિંમતનો ભારતીય બનાવટનો દારૂ અને બિયરનો જથ્થો ઝડપાઇ ગયો હતો સાથે જ ટ્રક તથા પાણીની બોટલોના ૮૭૫ કેરેટ અને મોબાઇલ મળી કુલ રૂા. ૪૬,૧૨,૩૪૦ ના મુદામાલ સાથે ટ્રકચાલક અમરા ગલા મોરી, રહે. રાણપર, તા. ભાણવડ, દ્વારકાની ધરપકડ કરવામાં આવી હતી.

દરમ્યાન પોલીસ પુછપરછમાં ટ્રકચાલક આ જથ્થો તેમના ગામના નાગા રાજા કોડીયાતરના કહેવાથી લાવ્યો હોવાનું અને દમણથી અજાણ્યા શખ્સે ભરી આપ્યો હોવાની કબુલાત આપી હતી. ધંધુકા પોલીસે ટ્રકચાલક સહિત ત્રણેય વિરુઘ્ધ ધંધુકા પોલીસ મથકમાં પ્રોહીબીશન એકટ તળે ફરીયાદ નોંધી ફરાર બંને બુટલેગરને શોધવા ચક્રો ગતીમાન કર્યા છે.

લાઈક અને ફોલો કરો અમારું ફેસબુક પેજ FACEBOOK - AAJKAALDAILY

ફોલો કરો અમારું ઇન્સ્ટાગ્રામ INSTAGRAM - AAJKAALDAILY

સબસ્ક્રાઈબ કરો અમારી યૂ ટ્યૂબ ચેનલ YOUTUBE - AAJKAALDAILY

મહત્વના સમાચારો આપના મોબાઇલમા મેળવવા માટે જોડાઓ અમારા વોટ્સએપ ગ્રૂપમાં 99251 12230

View News On Application