કોટડાસાંગાણીમાં સાંકડા રોડથી ટ્રાફિક સમસ્યા માથાનો દુ:ખાવો બની છે, રોજ બેરોજની આ સમસ્યાથી વાહનચાલકો ત્રાહીમામ પોકારી ઉઠયા છે. જયારે બાયપાસ રોડ લાંબા સમયથી મંજુર થઇ ગયો હોવા છતાં આજ સુધી કામ ચાલુ કરવામાં ન આવતા નાછૂટકે લોકોને સાંકડા રસ્તામાંથી પસાર થવું પડી રહ્યું છે. જેના કારણે આ ટ્રાફિક સમસ્યા પણ ઉદભવી રહી છે. અનેક વખત આ ટ્રાફિકની લાઇનોમાં ઇમરજન્સી સમયે એમ્બ્યુલન્સને પણ લાંબો સમય સુધી રાહ જોવી પડે છે જેના કારણે લોકોનું જીવન પણ જોખમાય છે. એક બાજુ રસ્તાઓ નાના હોવાથી મોટા વાહન નીકળતા આ એક કિલોમીટર લાંબા રોડ પર ટ્રાફિક જામની પરિસ્થિતિ સર્જાય છે. આ રોડ ઉપર પ્રાથમિક તાલુકા શાળા અને કન્યાશાળાઓ આવે છે. જેમાં બાળકોને વાહનોની અવર–જવર વચ્ચે જવું પડી રહ્યું છે. આ ઉપરાંત રાહદારીઓ માટે પણ વાહનો જોખમી સાબિત થઇ શકે છે ત્યારે વહેલી તકે બાયપાસ રોડનું કામ શરૂ કરવામાં આવે તેમજ ટ્રાફિક સમસ્યા હલ કરવા માટે તત્રં યોગ્ય કાર્યવાહી કરે તેવી લોકોમાં માગ ઉઠી છે