અમદાવાદ ખાતે નરેન્દ્ર મોદી સ્ટેડિયમમાં વર્લ્ડ કપની પ્રથમ મેચ યોજાવા જઈ રહી છે. જેને લઈને ગુજરાત મેટ્રો રેલ કોર્પોરેશન દ્વારા મેટ્રોના સમયમાં ફેરફાર કરવામાં આવ્યો છે. વર્લ્ડ કપની મેચ દરમ્યાન સવારે 6.20 થી રાત્રીના 1.00 વાગ્યા સુધી મેટ્રો રેલ ચાલુ રહેશે.

ક્રિકેટ રસીયાઓ માટે આગામી સમયમાં વર્લ્ડ કપ શરૂ થવા જઈ રહ્યો છે. જેનો ઉત્સાહ સારો જોવા મળી રહ્યો છે. ત્યારે આ ઉત્સાહને ધ્યાને રાખીને મેચ જોવા ગયેલા લોકોને મેટ્રો ટ્રેનની સુવિધા મળી રહે તે માટે તેના સમયમાં ફેરફાર કરવામાં આવ્યો છે. ગુજરાત મેટ્રો રેલ કોર્પોરેશન લી. દ્વારા અમદાવાદમાં રમાનાર મેચનાં દિવસે ટાઈમમાં ફેરફાર કર્યો છે. જેમાં 5 તેમજ 14 ઓક્ટોમ્બરનાં રોજ મેટ્રો ટ્રેન સવારે 6.20થી મધ્યરાત્રિના એક વાગ્યા સુધી ચાલુ રાખવાનો નિર્ણય લેવામાં આવ્યો છે. જેને પગલે મેચ જોવા ગયેલા તમામ ક્રિકેટ રસિકોને મુસાફરીમાં કોઈ પરેશાની થશે નહીં. 

મુસાફરોની સવલત માટે આ સુવિધા કરાઈ શરૂ

મોટેરા સ્ટેડિયમ મેટ્રો સ્ટેશન પરથી પરત મુસાફરી માટે ટિકિટની ખરીદીમાં ભીડ ટાળવા મુસાફરોની સુવિધા માટે પેપર ટિકિટની સુવિધા શરૂ કરવામાં આવી છે. જે પરત મુસાફરી માટે મેચનાં દિવસે રાત્રે 10 કલાક પછી કોઈ પણ સ્ટેશન સુધીની મુસાફરી માટે રૂ. 50 નાં નિશ્ચિત દરે ખરીદી કરી શકશે.