ભગતસિંહજી ગાર્ડન સામે શિવશક્તિ કોલોનીમાં રહેતા નામચીન ઉમંગ પટેલના ઘર પાસે જ આવેલી તેની ઓફિસે ત્રણ શખસો ધસી આવ્યા હતા. ઉમંગ પટેલ ક્યાં છે તેમ કહી તેના બે મિત્રોને આ શખસોએ ઢીકાપાટુનો માર મારી જાનથી મારી નાખવાની ધમકી આપી હતી. જે અંગે યુનિવર્સિટી પોલીસ સ્ટેશનમાં ફરિયાદ નોંધાવવામાં આવી છે.

જાણવા મળતી વિગતો મુજબ, લોધીકા તાલુકાના ચીભડા ગામે રહેતા અજયપરી જયસુખપરી ગોસ્વામી(ઉ.વ 23) નામના યુવાને યુનિવર્સિટી પોલીસ સ્ટેશનમાં નોંધાવેલી ફરિયાદમાં આરોપી તરીકે મંથન સોનાગ્રા (રહે. સાધુવાસવાણી રોડ), સાહિલ કચરા અને એક અજાણ્યા શખસનું નામ આપ્યું છે.

યુવાને ફરિયાદમાં જણાવ્યું હતું કે, ગઈકાલ રાત્રિના તે શિવ શક્તિ કોલોની બ્લોક નંબર 111 શેરી નંબર આઠ પાસે રહેતા તેના મિત્ર ઉમંગ ગોવિંદભાઈ ભૂતની ઓફિસે એકલો બેઠો હતો ત્યારે ત્રણેય આરોપીઓ અહીં ધસી આવ્યા હતા અને કહેવા લાગ્યા હતા કે, ક્યાં છે ઉમંગ ભૂત તેને બોલાવ તેનું સરનામું બતાવ તેને આજે જાનથી મારી નાખવો છે. જેથી યુવાને કહ્યું હતું કે ઉમંગ અહીંયા નથી બહાર ગયો છે આ સાંભળી આ ત્રણેય શખસો યુવાનને ગાળો- ધમકી આપી ઢીકાપાટુનો માર મારવા લાગ્યા હતા. ત્રણેય ઓફિસની બહાર નીકળતા હતા ત્યારે યુવાનનો અન્ય મિત્રો સાહિલ સુરાણી અહીં આવતા આ શખસોએ તેને પણ કહ્યું હતું કે, ઉમંગ ભૂતને બોલાવ આજે તો તેને જાનથી મારી નાખો છે. તેમ કહી તેને પણ ગાળો આપી અહીંથી જતા રહ્યા હતા. બાદમાં આ અંગે યુવાને યુનિવર્સિટી પોલીસ સ્ટેશનમાં ફરિયાદ નોંધાવતા પોલીસે ત્રણેય આરોપીઓ સામે ઓફિસમાં ગેરકાયદે પ્રવેશ કરી યુવાનને મારમારી ધમકી આપ્યા અંગે ગુનો નોંધ્યો છે.