રાજકોટની ભાગોળે આવેલા શાપર વેરાવળ પડવલા અને પારડી ગામમાં આજે બપોરે ૧૨–૫૦ થી ૧:૩૯ વાગ્યા દરમ્યાન ઉપરાછાપરી ભૂકંપના ત્રણ આચકા આવતા લોકોમાં ભયની લાગણી ફેલાવવા પામી છે. ભૂકંપની તીવ્રતા પ્રમાણમાં ઓછી હતી પરંતુ આમ છતાં લોકો ભયના માર્યા પોતાના ઘર– ફેકટરીમાંથી બહાર નીકળી ગયા હતા.

રાજકોટ જિલ્લા કલેકટર કચેરીમાં ઊભા કરવામાં આવેલા ડિઝાસ્ટર મેનેજમેન્ટ ઓથોરિટીના કંટ્રોલ મના નાયબ મામલતદાર મોરી નો આ બાબતે સંપર્કતા તેમણે જણાવ્યું હતું કે ભૂકંપના ત્રણ આચકા આવ્યા છે. પ્રથમ આચકો ૧૨–૫૦ વાગ્યે ૨.૧ મેિટુટ આવ્યો હતો. ત્યારે લોકોએ તેને સામાન્ય ગણ્યો હતો અને ખાસ ગંભીરતા લીધી ન હતી. પરંતુ ત્યાર પછીની માત્ર ૨૦ મિનિટમાં બીજો આંચકો ૧–૧૭ વાગ્યે ૨.૩ ની તીવ્રતાનો આવ્યો હતો અને લોકોમાં ગભરાટની લાગણી ફેલાવા પામી હતી. શું થયું છે, શું થઈ રહ્યું છે ?તેવા સવાલો લોકો એકબીજાને પૂછી રહ્યા હતા ત્યાં ૧–૩૯ મિનિટે ફરી ત્રીજો આચકો આવ્યો હતો અને તે ૧.૮ ની તીવ્રતાનો હતો.

આ બાબતે રાજકોટ જિલ્લા કલેકટર કચેરીના કંટ્રોલમનો સંપર્ક સાધતા તેમણે જણાવ્યું હતું કે ભૂકંપનું એપી સેન્ટર રાજકોટ થી સાઉથ ઈસટ દિશામાં ૧૭ કીલોમીટર દૂર જોવા મળ્યું છે. જિલ્લા કલેકટર કચેરીના સત્તાવાર સાધનોના જણાવ્યા મુજબ ભૂકંપના કારણે જાનહાનિના કે તે પ્રકારના કોઈ સમાચાર સદનસીબે હજુ સુધી મળ્યા નથી. પરંતુ સમગ્ર તંત્રને એલર્ટ કરી દેવામાં આવ્યું છે.

સરકારી ચોપડે તો માત્ર સાપર અને લોધિકા તાલુકાના પારડી ગામે ભૂકંપના આચકા આવ્યા હોવાનું નોંધાયું છે પરંતુ આ વિસ્તારના લોકોના જણાવ્યા મુજબ પડવલા થી સાપરમાં આવેલા શીતલા માતાના મંદિર સુધી ની આખી પટ્ટીમાં લોકોએ ધ્રુજારી અનુભવી છે.રાજકોટની ભાગોળે સાપર વેરાવળમાં અને પારડી તથા પડવલામાં આવેલા ભૂકંપના આ આચકા બાબતે ગાંધીનગર ખાતે સીસમોલોજી સેન્ટરને પણ જાણ કરવામાં આવી છે.


લોકોએ ૯ આંચકા અનુભવ્યા
શાપર, વેરાવળ, પડવલા અને પારડી આસપાસના વિસ્તારમાં આજે બપોરે ૧૨–૫૦ વાગ્યાથી ૧–૩૯ વાગ્યા દરમિયાન ભુકંપના ત્રણ આંચકા આવ્યા હોવાનું જિલ્લા કલેકટર કચેરીમાં ઉભા કરાયેલા ડિઝાસ્ટર મેનેજમેન્ટ ઓથોરિટીના કન્ટ્રોલરૂમ દ્રારા જાણવા મળે છે. જોકે, શાપર વેરાવળ, પડવલા અને પારડી આસપાસના ગામના વિસ્તારના લોકોના જણાવ્યા મુજબ કુલ ૯ વખત આંચકા આવ્યા છે. લોકોના જણાવ્યા મુજબ પ્રથમ આંચકો ૧૨–૫૦ વાગ્યે, બીજો ૧૨–૫૪ વાગ્યે ત્રીજો ૧–૦૭ વાગ્યે, ચોથો ૧–૧૩ વાગ્યે, પાંચમો ૧–૧૭ વાગ્યે, છઠ્ઠો આંચકો ૧–૧૮ વાગ્યે, સાતમો ૧–૩૯ વાગ્યે આવ્યો હતો અને ત્યારબાદ સતત ઉપરાછાપરી બે આંચકા આવ્યા હતાં.