કુવાડવા રોડ પર બેટી રામપરા ગામે ખનીજ ચોરી થતી હોવાનું કવરેજ કરવા ગયેલા યુવકને ફોન ઉપર અને રૂબરૂમાં તમે જીવી નહિ શકો ખોટી જગ્યાએ ભરાઈ ગયા છો તેવી ધમકી ધમકી આપતા યુવકે સાગર ડવ, ચેતન અને અજાણ્યા સામે ગાંધીગ્રામ પોલીસમાં ફરિયાદ નોંધાવતા પોલીસે ગુનો નોંધ્યો છે.

રૈયાધારમાં ડ્રિમ સિટીમાં રહેતા અને રૈયા ચોકડી નજીક વેસ્ટ ગેઇટમાં ઓફિસ ધરાવતા અમિત બિપીનભાઈ ઠક્કર ગત તા.21ના બપોરે સાથે કામ કરતા જીગર અને નીરવ સાથે બેટી રામપરા કારખાને જતા હતા ત્યારે રસ્તામાં ગેરકાયદેસર ખનીજ ચોરી થતી હોવાનું જાણવા મળતા સાથે રહેલા માણસો જીગર અને નીરવને કવરેજ કરવા માટે મોકલ્યા હતા. દરમિયાન ત્યાં હાજર ધવલ મેતાજીએ ફોન કરી તેના માલીકને વાત કરવાનું કહેતા ફોનમાં રહેલા વ્યક્તિએ અહીંથી ચાલતી પકડો કહી ધમકાવ્યા હતા. બાદમાં બંને માણસો ઓફિસે આવી ગયા હતા. તા.21ના અમિત ઠક્કર પોતાની ઓફિસે હતો ત્યારે જુદા જુદા નંબરથી માંથી સાગર ડવ નામના વ્યક્તિના ફોન આવ્યા હતા અને તમે ખોટી જગ્યાએ ભરાઈ ગયા છોવ કહી મારી નાખવાની ધમકી આપી હતી. તેમજ સાંજના સમયે સાગર ડવનો માણસ ચેતન અને અજાણ્યો રૂબરૂ આવી ધમકાવવાનો પ્રયાસ કર્યો હતો. ફરિયાદી અમિત ભારત હેડ લાઇન્સ નામનું અખબાર ચલાવતો હોવાનું પોલીસમાં જણાવ્યું છે. પોલીસે યુવકની ફરિયાદના આધારે આગળની તપાસ હાથ ધરી છે.