જેહાદથી અમદાવાર એરપોર્ટ પર આવેલી ઇન્ડિગોની ફ્લાઈટમાં એક હસ્તલિખિત ધમકીભરી ચિઠ્ઠી મળી આવી છે. જેમાં અમદાવાદ એરપોર્ટને બોમ્બથી ઉડાવી દેવાની ધમકી મળી છે. આ અંગેની જાણ થતા જ સુરક્ષા એજન્સીઓમાં દોડધામ વધી ગઈ છે. જોકે, સુરક્ષા એજન્સી દ્વારા તમામ મુસાફરોને સુરક્ષિત રીતે ફ્લાઇટમાંથી બહાર કાઢી લેવામાં આવ્યા છે. ચિઠ્ઠી લખનારની ઓળખ મેળવવા માટે તમામ મુસાફરોના રાઇટિંગ સેમ્પલ લેવાનો નિર્ણય લેવામાં આવ્યો છે.

ઈન્ડિગોની ફ્લાઈટમાંથી હસ્તલિખિત ચીઠ્ઠી મળી આવી
અમદાવાદ એરપોર્ટ પર આવેલી ઇન્ડિગો ફ્લાઈટમાંથી મુસાફરો જ્યારે બહાર નીકળ્યા ત્યારબાદ ક્લીનર દ્વારા ફ્લાઇટ ક્લીન કરવામાં આવી રહી હતી. તે દરમિયાન હાથથી લખેલી ચીઠ્ઠી મળી આવી હતી. જેમાં એરપોર્ટને ઉડાવી દેવાની ધમકી મળી હતી. આ ધમકી ભરેલી ચીઠ્ઠી અંગે એરપોર્ટ ઓથોરિટીએ પોલીસને જાણ કરતા પોલીસ સ્થળ પર પહોંચી છે. 

એરપોર્ટમાં સીઆઇએસએફ દ્વારા ચેકિંગ
પોલીસ દ્વારા ગુનો નોંધવાની તજવીજ હાથ ધરવામાં આવી છે. આ ઉપરાંત આ ચિઠ્ઠી એફએસએલમાં પણ મોકલવામાં આવશે તથા જે પણ મુસાફર ફ્લાઈટમાં હતા તેના પણ લખાણના સેમ્પલ લેવામાં આવશે. મુસાફરમાંથી કોઈ મુસાફરે ચિઠ્ઠી લખેલું સાબિત થશે તો તેની સામે કાર્યવાહી કરવામાં આવશે. હાલ એરપોર્ટમાં સીઆઇએસએફ દ્વારા ચેકિંગ કરવામાં આવી રહ્યું છે.

પોલીસ સહિતની એજન્સીઓ એરપોર્ટ પર હાજર
ઝોન 4 ડીસીપી કાનન દેસાઇએ જણાવ્યું હતું કે, બોમ્બની ધમકી મળતાં પોલીસની ટીમ સ્થળ પર પહોંચી છે. ધમકી આપનાર વ્યકિત અંગે તપાસ કરવામાં આવી રહી છે. હાલ એરપોર્ટ પોલીસ પણ એરપોર્ટ પર હાજર છે.