વધતી ઉંમરની સાથે વૃદ્ધત્વના સંકેતો દેખાવા સામાન્ય વાત છે, પરંતુ ખરાબ જીવનશૈલીના કારણે યુવાનીમાં જ ચહેરા પર વૃદ્ધાવસ્થા (પ્રીમેચ્યોર એજિંગ)ના ચિહ્નો દેખાવા લાગે છે. આપણી કેટલીક એવી ખાવા-પીવાની આદતો છે જેના કારણે ઉંમર પહેલા જ વૃદ્ધત્વના સંકેતો દેખાવા લાગે છે. અહીં આપણે તે આદતો વિશે જાણીશું. ચાલો જાણીએ કઈ છે તે આદતો.

ઉંમરની સાથે ચહેરા પર દેખાતી કરચલીઓ અને ફાઈન લાઈન્સથી વ્યક્તિ વૃદ્ધ દેખાય છે પરંતુ જો આ ફાઈન લાઈન્સ અને કરચલીઓ નાની ઉંમરે દેખાવા લાગે તો વ્યક્તિમાં આત્મવિશ્વાસમાં ઘટાડો જોવા મળી શકે. આ ઉપરાંત અકાળે વૃદ્ધત્વ ત્વચાને પણ ઘણું નુકસાન કરે છે. જો કે આજની બિઝી લાઈફમાં વ્યક્તિ પોતાના કામમાં એટલો ડૂબેલો હોય છે કે તેના ખોરાક અને જીવનશૈલી પર ધ્યાન આપવા માટે સમય જ બચતો નથી.

આજકાલ બિનઆરોગ્યપ્રદ ફાસ્ટ ફૂડ, મસાલેદાર જંક ફૂડ વગેરે ખાવાનું ચલણ વધી ગયું છે.  જેના કારણે વ્યક્તિ નાની ઉંમરમાં જ વૃદ્ધ દેખાવા લાગે છે. જો આવું થઈ રહ્યું હોય તો કેટલીક ખાનપાન આદતોને બદલીને આ સમસ્યાથી છુટકારો મેળવી શકાય છે.

ખાવાની આ આદતો અકાળે વૃદ્ધત્વનું કારણ બની શકે

આલ્કોહોલિક ડ્રિંક્સ - આલ્કોહોલિક પીણાં શરીરને ડિહાઇડ્રેટ કરે છે. ઉપરાંત દારૂના સેવનથી રક્ત પરિભ્રમણ પણ પ્રભાવિત થાય છે. લાંબા સમય સુધી તેનું સેવન કરવાથી ત્વચા પર કરચલીઓ અને ફાઈન લાઈન્સ જેવા વૃદ્ધત્વના ચિહ્નો દેખાવા લાગે છે.

હાઈ સોડિયમવાળો ખોરાક - સૂપ, ચિપ્સ, બેકડ આઇટમ્સ, ફ્રોઝન ફૂડ આઇટમ્સ, ચટણીઓ અને મસાલા વગેરેમાં સોડિયમ વધુ માત્રામાં જોવા મળે છે. જેના કારણે શરીરમાં પાણી જમા થઈ શકે છે અને ત્વચા પર સોજો પણ આવી શકે છે. તેના કારણે ત્વચા પર વૃદ્ધત્વના લક્ષણો પણ જોવા મળે છે.

સફેદ ખાંડ - સફેદ ખાંડથી ભરપૂર ખાદ્યપદાર્થોનું વધુ પડતું સેવન કરવાથી શરીરમાં બ્લડ સુગર લેવલ વધે છે પરંતુ તેનાથી સોજો અને કોલેજન સંબંધિત સમસ્યાઓ પણ થાય છે. જેના કારણે ત્વચા પર કરચલીઓ અને ફાઈન લાઈન્સ દેખાવા લાગે છે.

પ્રોસેસ્ડ મીટ - પ્રોસેસ્ડ મીટનું વધુ પડતું સેવન કરવાથી શરીરમાંથી ભેજ દૂર થઈ જાય છે અને ચહેરો શુષ્ક અને નિર્જીવ દેખાય છે. જેના કારણે ત્વચા પર ખીલ અને કરચલીઓ દેખાવા લાગે છે.

પેકેજ્ડ ફૂડ - ચિપ્સ, ક્રિસ્પ્સ, બિસ્કિટ, પ્રિઝર્વેટિવ્સ અને રિફાઈન્ડ ઘટકોથી બનેલા પેકેજ્ડ ફૂડ સ્વાસ્થ્ય માટે ખૂબ જ નુકસાનકારક હોય શકે છે. વધુ માત્રામાં તેનું સેવન કરવાથી ઓક્સિડેટીવ નુકસાન થઈ શકે છે, જે વૃદ્ધત્વનું કારણ બને છે.