નવા હોસ્પિટલ રજીસ્ટ્રેશન એકટ અંતર્ગત રાજકોટ જિલ્લામાં આવેલ તમામ ખાનગી હોસ્પિટલો, દવાખાનાઓ અને લેબોરેટરીઓનું ફરજિયાત રજીસ્ટ્રેશન કરવાનો નિર્ણય રાજકોટ જિલ્લા પંચાયતની આરોગ્ય સમિતિની બેઠકમાં લેવાયો હતો.
જિલ્લા પંચાયત ખાતે આરોગ્ય સમિતિના ચેરમેન લીલાબેન ઠુંમરના અધ્યક્ષસ્થાને સમીક્ષા બેઠક યોજવામાં આવી હતી. આ બેઠકમાં બાંધકામ, મંકીપોકસ, આભા કાર્ડ, દવા છંટકાવ, રોગચાળા, આયુષમાન કાર્ડ, આયુર્વેદ દવાખાના, બઢતી, ભરતી, સ્વભંડોળ સહિતના મુદ્દે ચર્ચા–વિચારણા કરીને, તે મુજબ કામગીરી કરવા આવશ્યક સૂચના આપવામાં આવી હતી.
આ બેઠકમાં એ.પી.એલ. અને બી.પી.એલ.કેટેગરીની હાઇ રીસ્ક મધરને રૂા.૧૫ હજાર સહાય આપવાની યોજનાનો લાભ આપવા અને ડીલીવરી દરમિયાન સાત દિવસ જિલ્લા કક્ષાની હોસ્પિટલમાં દાખલ કરવા જણાવાયું હતું.
વધુમાં, મંકીપોકસનો ગુજરાતમાં કોઇ કેસ નોંધાયો નથી, કેરલમાં કેસ નોંધાયેલા છે. આ વાયરસથી ફેલાતો રોગ છે. આથી, તકેદારીના પગલા લેવા સૂચના આપવામાં આવી હતી. દરેક લોકોના આભા કાર્ડ કાઢવા માટે એપ્લીકેશન ડાઉનલોડ કરવાની જાગૃતિ ફેલાવવા જણાવ્યું હતું.
ઉપરાંત, પાણીજન્ય રોગચાળા જેવા કે ઝાડા–ઉલ્ટી, કમળો, કોલેરા, ટાઇફોઇડ વગેરેમાં રોગ અટકાયત માટે જરી પગલાં લેવા અને મચ્છરનો ઉપદ્રવ થતો અટકાવવાની કામગીરી વધુ અસરકારક બનાવવા સૂચનો આપ્યા હતા.
આ ઉપરાંત, જિલ્લામાં પ્રસુતિની નોંધણી ૯૯% કરતા વધુ થાય છે. પરંતુ વહેલી નોંધણી કરાવવા સૂચના અપાઇ હતી. જિલ્લાની લેબોરેટરી અને દવાખાનાની ફરજિયાત નોંધણી કરાવવા સુચના આપવામાં આવી હતી. તેમજ સી.ડી.એચ.ઓ., આર.સી.એચ.ઓ., ઇ.એમ.ઓ., ડેટા મેનેજરની જગ્યા બાબતે કરાયેલી રજુઆત કરવા અંગે ચર્ચા કરવામાં આવી હતી.
આ બેઠકમાં મુખ્ય જિલ્લા આરોગ્ય અધીકારી ડો. પી.કે.સિંઘ, આર.સી.એચ.ઓ., બાંધકામ શાખાના અધીકારી, જિલ્લા પશુપાલન અધિકારી, એપેડેમિક મેડિકલ ઓફિસર, જિલ્લા મેલેરીયા અધિકારી સહિતના અધિકારીઓ અને કર્મચારીઓ ઉપસ્થિત રહ્યાં હતાં