શહેરના ચિત્રા વિસ્તારમાં આવેલા ગોતમેશ્વરનગર શેરી નંબર ૧માં વગર મંજૂરીએ શેડ ઉભા કરી દેવાયા અંગે મ્યુ. કમિ. સમક્ષ કરવામાં આવેલી રજુઆતના પગલે મહાપાલિકાના દબાણ હટાવ સેલ ના કાફલાએ કમિશ્નર ઉપાધ્યાયની સીધી સૂચના હેઠળ જેસીબી સાથે ત્રાટકી ગેરકાયદેસર ઉભા કરી દેવાયેલા શેડ તોડી પાડી જગ્યા દબાણ મુક્ત કરી હતી. જ્યારે રવિવારે મુખ્યમંત્રીના ભાવનગર શહેર-જિલ્લાના પ્રવાસ સંદર્ભે મહાપાલિકા તંત્ર દ્વારા મુખ્ય મંત્રીના રૂટ વિમાન ઘરથી રૂવાથી સુભાષનગર રોડ સહિતના વિસ્તારમાંથી નાના-મોટા દબાણો હટાવવાની કાર્યવાહી હાથ ધરી હતી. જેમાં લારી, ગલ્લા અને કેબીન તેમજ અન્ય અડચણરૂપ એવા અસ્થાઈ દબાણો દૂર કરી માલ-સામાન જપ્ત કર્યો હતો. ઉલ્લેખનીય છે કે શહેરમાં મ્યુ. તંત્ર દ્વારા છેલ્લા એક વર્ષથી દબાણ હટાવ અભિયાન શરૂ કરાયું છે. જેમાં અપવાદરૂપ જાહેરરજાઓ સિવાઈ અવરિત જારી રહ્યું છે. ત્યારે દબાણકર્તાઓ પણ સતત દબાણો કરી રહ્યા છે.