ગોંડલ રોડ પર ટાટાના શોમ પાસે રાજકોટ લેબ નજીકથી મૂળ માંગરોળ પંથકના વતની અને હાલ શાપરમાં રહેતા શખસને એસઓજીની ટીમે દેશી બનાવટની પિસ્તોલ અને બે જીવતા કાર્ટીસ સાથે ઝડપી લીધો હતો. આરોપીની પૂછતાછ કરતા આ હથિયાર તેના મિત્રએ સાચવવા આપ્યું હોવાની અને તેણે શોખ માટે હથિયાર સાથે રાખ્યું હોવાની કબુલાત આપી હતી. આ અંગે પોલીસ એ વિશેષ તપાસ હાથ ધરી છે.

જાણવા મળતી વિગતો મુજબ, આગામી સમયમાં લોકસભાની ચૂંટણી હોય તે અંતર્ગત કાયદો વ્યવસ્થાની સ્થિતિ જળવાઈ રહે તે માટે ઉચ્ચ પોલીસ અધિકારીઓની સૂચનાના પગલે રાજકોટ એસઓજી પીઆઈ જે.એસ.કૈલાની રાહબરી હેઠળ ટીમ પેટ્રોલિંગમાં હતી. દરમિયાન એ.એસ.આઈ ફિરોજભાઈ શેખ, હેડ કોન્સ્ટેબલ ઉપેન્દ્રસિંહ ઝાલાને મળેલી બાતમીના આધારે રાજકોટ ગોંડલ હાઇવે પર ટાટાના શોમ પાસે રાજકોટ લેબ નજીકથી એક શખસને શંકાસ્પદ હાલતમાં ઝડપી લીધો હતો. પોલીસે આ શખસની પૂછતાછ કરતા તેણે પોતાનું નામ નિલેશ પ્રવીણભાઈ ચૌહાણ (ઉ.વ ૨૪ રહે. ભકિતનગર સોસાયટી બીલીપત્ર એપાર્ટમેન્ટ લેટ નંબર ૧૦૧, શાપર મૂળ, માંગરોળ) હોવાનું જણાવ્યું હતું. પોલીસે આ શખસની અગં ઝડતી લેતા તેની પાસેથી દેશી બનાવટની પિસ્તોલ અને બે જીવતા કાર્ટીસ મળી આવ્યા હતા જેથી તેની ધરપકડ કરી હતી.
પોલીસે વિશેષમાં જણાવ્યું હતું કે, આરોપી નિલેશ કારખાનામાં મજૂરી કામ કરે છે. હથિયાર અંગે તેની પૂછતાછ કરતા આ હથિયાર તેને તેના મિત્ર કે જેને કોઈ સાથે માથાકૂટ ચાલતી હોય તેણે સાચવવા આપ્યું હતું. પોતે શોખ ખાતર હથિયાર સાથે રાખ્યું હતું. આ મામલે પોલીસે આરોપીને હથિયાર આપનાર તેના મિત્રને ઝડપી લેવા તપાસ હાથ ધરી છે