કાલાવડ તાલુકાના મકાજી મેઘપરમાં વરસાદી પાણીના લીધે વહેણમાં તણાઇ ગયેલા યુવાનનો મૃતદેહ કાલે કાલાવડ ફાયર બ્રિગેડની ટીમે શોધી કાઢી પોલીસને સોપ્યો હતો, મૃતક યુવાન અગરબત્તીનો વેપાર કરવા તેના મિત્ર સાથે મકાજી મેઘપર ગામમાં આવ્યો હતો અને આકસ્મીક બનાવ બન્યો હતો.
બે દિવસ પહેલા કાલાવડ પંથકમાં વરસાદ આવ્યો હતો અને વરસાદી પાણીના લીધે બે યુવકે નદીના વહેણમાં તણાયા હતા જે પૈકી એકને તુરતં બહાર ખેંચી લઇ બચાવી લેવાયો હતો જયારે અન્ય એક યુવાન નદીમાં તણાઇ ગયો હતો આથી લોકો એકત્ર થઇ ગયા હતા અને આ અંગે કાલાવડ ફાયર બ્રિગેડને જાણ કરવામાં આવી હતી.
દરમ્યાન ફાયરના જવાનોએ શોધખોળ કરીને યુવાનનો મૃતદેહ ૨૪ કલાક બાદ શોધી કાઢયો હતો અને પોલીસને જાણ કરી હતી જેથી મૃતક અંગે તપાસ કરવામાં આવી હતી, મરનાર રાજકોટના શિવમપાર્ક–૫ ખાતે રહેતા હરપાલસીંગ ચતુરસીંગ જટ (ઉ.વ.૨૮) હોવાનું ખુલ્યુ હતું, હરપાલસીંગ અગરબત્તીનો વેપાર કરવા રાજકોટથી મકાજી મેઘપર ગામે તેના મિત્ર સાથે આવેલ હોય અને પરત ફરતી વેળાએ વરસાદી પાણીના લીધે ગામથી એકાદ કીમી દુર પુલ પરથી પસાર થતી વેળાએ તણાઇ જતા ડુબી જવાથી મૃત્યુ થયુ હતું, આ અંગે ચતુરસીંગ મહેન્દ્રસીંગ જટ દ્રારા ગઇકાલે કાલાવડ ગ્રામ્ય પોલીસમાં જાણ કરવામાં આવી હતી.