રાજકોટ મહાનગરપાલિકાનું મુખ્ય અને ૫૦ વર્ષ જૂનું કનક રોડ ફાયર બ્રિગેડ સ્ટેશનનું જર્જરિત થયેલું બિલ્ડીંગ તોડી પાડીને તેના સ્થાને રૂ.૯ કરોડના ખર્ચે આધુનિક ફાયર સ્ટેશન બિલ્ડીંગ બનાવવા માટે કાર્યવાહી હાથ ધરવામાં આવી છે.

વિશેષમાં આ અંગે મહાપાલિકાના સૂત્રોએ જણાવ્યું હતું કે છેલ્લા ઘણા વર્ષોથી જર્જરીત હાલતમાં રહેલા કનક રોડ ફાયર સ્ટેશન બિલ્ડીંગનું નવીનીકરણ અત્યંત જરૂરી હોય છેલ્લા બે વર્ષથી આ અંગે ચર્ચા વિચારણા ચાલી રહી હતી ગત ચોમાસે તો એવી સ્થિતિ સર્જાઈ હતી કે ફાયર બ્રિગેડ સ્ટેશનના કન્ટ્રોલરૂમની છતમાંથી વરસાદી પાણી ટપકવા લાગ્યું હતું અને તેના કારણે ટેલિફોન ઠપ થઈ ગયા હતા.

કનક રોડ ફાયર સ્ટેશન બિલ્ડીંગનું કામ ચાલે ત્યાં સુધી હંગામી ધોરણે શહેરના ઢેબર રોડ ઉપર નાગરિક બેન્ક ચોકમાં આવેલા પ્લોટમાં ફાયર સ્ટેશનનું સ્થળાંતર કરવાની વિચારણા હાથ ધરવામાં આવી છે.

અત્રે ઉલ્લેખનીય છે કે શહેરના મોટાભાગના ફાયર બ્રિગેડ સ્ટેશન નવા અને આધુનિક બિલ્ડિંગમાં કાર્યરત છે. ફક્ત સૌથી જૂનું કનક રોડ ફાયર સ્ટેશન જુના બિલ્ડીંગ માં બેસે છે હવે વર્ષો જૂનું આ બિલ્ડીંગ તોડીને ત્યાં આગળ સ્ટાફ ક્વાર્ટર્સ સાથેનું નવું આધુનિક બિલ્ડીંગ બનાવશે તેમજ કંટ્રોલરૂમ પણ વધુ અદ્યતન બનાવાશે