દેશના ઘણા ભાગોમાં એક મહિના કરતા વધુ સમયથી હીટવેવ ચાલુ છે. દેશના પચાસ ટકા ઉત્તર-પશ્ચિમ રાજ્યો 1951 પછીની સૌથી લાંબી ગરમીની મોસમનો સામનો કરી રહ્યા છે. હવામાન વિભાગના છેલ્લા 33 દિવસના આંકડા મુજબ આ વખતે ગરમીએ સાત દાયકાનો રેકોર્ડ તોડ્યો છે. ઉત્તર-પશ્ચિમ રાજ્યોની સાથે ઉત્તર-પૂર્વ અને હિમાલયના પ્રદેશમાં પણ તીવ્ર ગરમી પડી રહી છે.

દેશના ઘણા ઉત્તર-પશ્ચિમ અને પૂર્વીય રાજ્યોમાં તાપમાન 45 ડિગ્રીથી ઉપર છે. હવામાન વિભાગે ઉત્તર પ્રદેશ, ઉત્તરાખંડ, હિમાચલ, હરિયાણા, ચંદીગઢ, દિલ્હી, રાજસ્થાન, પંજાબ, મધ્ય પ્રદેશ, ઓડિશા, ઝારખંડ, બિહાર અને જમ્મુના કેટલાક વિસ્તારોમાં હીટ વેવને લઈને એલર્ટ જાહેર કર્યું છે.
હીટવેવનો પ્રકોપ યથાવત છે. ચોમાસાની સુસ્તીને કારણે રાજસ્થાન, દિલ્હી, હરિયાણા, પંજાબ, ઉત્તર પ્રદેશના ઘણા વિસ્તારો સૌથી લાંબી ઉનાળાની ઋતુનો સામનો કરી રહ્યા છે. આ વખતે રાત્રિના તાપમાનમાં પણ અસાધારણ વધારો થયો છે. રાત્રે પણ લોકોને રાહત મળી રહી નથી. ભારતીય હવામાન વિભાગના મહાનિર્દેશક એમ. મહાપાત્રાનું કહેવું છે કે દિવસનું તાપમાન ઘણું વધારે છે. તેથી કુદરતી રીતે જ રાત ઠંડી નથી થતી. જો મહત્તમ તાપમાન 45-46 ડિગ્રી સેલ્સિયસની વચ્ચે હોય તો તમે રાત્રિનું તાપમાન સામાન્ય રહેવાની અપેક્ષા રાખી શકતા નથી. ગુજરાત અને મધ્યપ્રદેશની દક્ષિણ સરહદ પર ઘણા દિવસોથી અટવાયેલું ચોમાસું આગળ વધવાની શક્યતા છે. આગામી દિવસોમાં ગરમીમાંથી રાહત મળવાની આશા છે.

દિલ્હીમાં 12 વર્ષ પછી સૌથી ગરમ રાત
દિલ્હીમાં માત્ર દિવસ જ નહીં પરંતુ રાત્રિનું તાપમાન પણ રેકોર્ડ તોડી રહ્યું છે. ગઈકાલે દિલ્હીમાં લઘુત્તમ તાપમાન 35.2 ડિગ્રી સેલ્સિયસ નોંધાયું હતું. આ સામાન્ય કરતાં આઠ ડિગ્રી વધુ છે. હવામાન વિભાગના જણાવ્યા અનુસાર રાજધાનીમાં 13 વર્ષ બાદ જૂનમાં આટલું ઊંચું લઘુત્તમ તાપમાન નોંધાયું હતું. મંગળવારની રાત આ સિઝનની સૌથી ગરમ રાત્રિ હતી. અગાઉ 2011માં લઘુત્તમ તાપમાન 35.2 ડિગ્રી સેલ્સિયસ સુધી પહોંચ્યું હતું. ગરમ રાત દિવસના તાપમાનને પણ અસર કરે છે. વહેલી સવારે મહત્તમ તાપમાનમાં વધારો થાય છે.


જૂનમાં સરેરાશ કરતાં 20 ટકા ઓછો વરસાદ
હવામાન વિભાગના જણાવ્યા અનુસાર, દેશમાં 1 થી 18 જૂન વચ્ચે 64.5 મીમી વરસાદ નોંધાયો છે, જે 80.6 મીમીની લાંબા ગાળાની સરેરાશ કરતા 20 ટકા ઓછો છે. જૂનથી સપ્ટેમ્બર સુધીના 4 મહિનાની ચોમાસાની સિઝનમાં સરેરાશ 868.6 મીમી વરસાદ પડવો જોઈએ.