ભારત અને ઇંગ્લેન્ડ વચ્ચે 5 મેચની T20 શ્રેણીની છેલ્લી મેચ મુંબઈના વાનખેડે સ્ટેડિયમ ખાતે રમાઈ હતી. આ મેચમાં ટીમ ઈન્ડિયાએ 150 રનથી જીત મેળવી અને શ્રેણી 4-1થી જીતી લીધી.

ઇંગ્લેન્ડ 97 રનમાં ઓલઆઉટ

ઇંગ્લેન્ડની ટીમ 97 રનમાં ઓલઆઉટ થઈ ગઈ. આ સાથે ટીમ ઈન્ડિયાએ આ મેચ 150 રનથી જીતી લીધી છે. ભારત તરફથી મોહમ્મદ શમી સૌથી સફળ બોલર રહ્યો. તેણે 3 વિકેટ લીધી. વરુણ ચક્રવર્તી, શિવમ દુબે અને અભિષેક શર્માને 2-2 સફળતા મળી. રવિ બિશ્નોઈએ પણ 1 વિકેટ લીધી. આ સાથે ટીમ ઈન્ડિયાએ શ્રેણી 4-1થી જીતી લીધી.

ટીમ ઈન્ડિયાએ 247 રનનો વિશાળ સ્કોર કર્યો

ટીમ ઇન્ડિયાનો દાવ પૂરો થયો ત્યારે ભારતીય ટીમે 20 ઓવરમાં 9 વિકેટ ગુમાવીને 247 રન બનાવ્યા છે. આ ઇનિંગમાં અભિષેક શર્માએ સૌથી વધુ 135 રન બનાવ્યા. જ્યારે શિવમ દુબેએ 30 રન અને તિલક વર્માએ 24 રનનું યોગદાન આપ્યું. બીજી તરફ ઇંગ્લેન્ડ તરફથી બ્રાઇડન કાર્સે સૌથી વધુ 3 વિકેટ લીધી.