દિલ્હી હાઈકોર્ટે છેડતીના એક કેસમાં આરોપીને અનોખી સજા આપી છે. કોર્ટે એક મહિલા સાથે છેડતી કરવા અને નુકસાન પહોંચાડવાના આરોપમાં આ અનોખી સજા આપી છે. જેમાં એક વ્યક્તિ અને તેના બે પુત્રો વિરુદ્ધ દાખલ કરવામાં આવેલી એફઆઈઆરને ફગાવી દીધી છે અને તેમને 50-50 લીમડાના છોડ વાવવાનો આદેશ આપ્યો છે. બંને પક્ષકારો સાથે વાતચીત કર્યા પછી, કોર્ટે કહ્યું કે તેઓએ પુષ્ટિ કરી છે કે આ મામલો કોઈપણ ધમકી, દબાણ અથવા બળ વિના તેમની વચ્ચે મૈત્રીપૂર્ણ રીતે ઉકેલવામાં આવ્યો છે. તેઓએ જણાવ્યું હતું કે, એફઆઈઆર રદ કરવામાં આવે તો તેમને કોઈ વાંધો નથી.

આવો નિર્ણય કેમ આપ્યો?

ન્યાયાધીશ અનુપ કુમાર મેંદિરત્તાની આગેવાની હેઠળની અદાલતે દરેક આરોપીને કરાર મુજબ 50 લીમડાના રોપા વાવવાનો આદેશ આપ્યો હતો. કોર્ટને જાણ કરવામાં આવ્યા બાદ આ ચુકાદો આવ્યો હતો કે વિવાદ જેમાં છેડતી, નુકસાન પહોંચાડવા, ચોરી અને ખોટી રીતે સંયમ કરવાના આરોપોનો સમાવેશ થાય છે.  તેને આર્બિટ્રેશન દ્વારા ઉકેલવામાં આવ્યો છે. આ મામલો 2015નો છે. ફરિયાદી અને આરોપી બંને સબંધીઓ છે.

જસ્ટિસ મેંદિરત્તાએ કૌટુંબિક વિવાદના શાંતિપૂર્ણ નિરાકરણ પર ભાર મૂકતા કહ્યું, 'તથ્યો અને સંજોગોને ધ્યાનમાં રાખીને અરજદારો પર દંડ લાદવાને બદલે  તેમને 50 લીમડાના રોપા વાવવાનો આદેશ આવ્યો છે. આ વૃક્ષારોપણ યોગ્ય બાગાયત અધિકારીઓની દેખરેખ હેઠળ છાવલા પોલીસ સ્ટેશનમાં થવું જોઈએ. કોર્ટે આદેશ આપ્યો છે કે રોપાયેલા રોપાઓના ફોટોગ્રાફ્સ સાથે પોલીસ રિપોર્ટ આઠ અઠવાડિયામાં સબમિટ કરવામાં આવે.  પર્યાવરણીય પહેલની સફળતાની ખાતરી કરવા માટે  છોડની જાળવણી સત્તાવાળાઓ દ્વારા દેખરેખ રાખવી જોઈએ.