શુક્રવારે જ્યારે કર્ણાટક હાઈકોર્ટે CIDને POCSO કેસમાં ભૂતપૂર્વ મુખ્ય પ્રધાન બીએસ યેદિયુરપ્પાની ધરપકડ કરવાથી રોક્યું ત્યારે તેમના પુત્ર બીવાય વિજયેન્દ્રએ કહ્યું કે ન્યાયના મંદિરમાં સત્યનો વિજય થશે.

હાઈકોર્ટે સીઆઈડીને પોક્સો એક્ટ હેઠળ નોંધાયેલા કેસમાં બીએસ યેદિયુરપ્પાની ધરપકડ કરવાથી રોકી દીધી હતી. તેમને 17 જૂને CID સમક્ષ હાજર થવા માટે પણ સૂચના આપવામાં આવી છે.

સોશિયલ મીડિયા પ્લેટફોર્મ પર બી. વાય. વિજયેન્દ્રએ પોસ્ટ કરતા કહ્યું કે કર્ણાટકના લોકોના આશીર્વાદ અને પ્રાર્થના ન્યાયના મંદિરમાં જોવા મળી છે. તેમણે કહ્યું કે રાજકીય ષડયંત્ર હંમેશા તેમના પિતાની પાછળ ચાલ્યા કરે છે. હિંમત હાર્યા વિના, તે ન્યાયના માર્ગે ચાલશે અને આ ષડયંત્રો પર વિજય નોંધાવશે. તેમનું કહેવું છે કે આ કેસમાં હાઈકોર્ટે વચગાળાના જામીન આપ્યા બાદ યેદિયુરપ્પાનું કાયદા પ્રત્યેનું સન્માન વધુ વધ્યું છે.

બી. વાય. વિજયેન્દ્રએ કહ્યું કે તેમના પિતા યેદિયુરપ્પા તપાસથી ડરતા નથી. તેમણે કહ્યું કે તેમને વિશ્વાસ છે કે તેઓ કોર્ટમાં જીતશે.

પોક્સો એક્ટ હેઠળ નોંધાયો હતો કેસ

નોંધનીય છે કે 14 માર્ચે યેદિયુરપ્પા વિરુદ્ધ બેંગલુરુની કોર્ટમાં POCSO એક્ટ હેઠળ કેસ નોંધવામાં આવ્યો હતો. ત્યારબાદ ગુરુવારે (13 જૂન) કોર્ટે તેમની વિરુદ્ધ બિનજામીનપાત્ર ધરપકડ વોરંટ જારી કર્યું હતું. યેદિયુરપ્પા બુધવારે પૂછપરછ માટે હાજર ન થયા હોવાથી  CIDએ તેમની સામે વોરંટની માંગણી માટે પ્રથમ ફાસ્ટ ટ્રેક કોર્ટનો સંપર્ક કર્યો હતો. યેદિયુરપ્પાએ તપાસમાં સામેલ થવા માટે સમય માંગ્યો હતો.

પોલીસના જણાવ્યા અનુસાર, યેદિયુરપ્પા પર 17 વર્ષની છોકરીનું યૌન શોષણ કરવાનો આરોપ છે અને આ આરોપ પીડિતાની માતાએ પોતે તેમના પર લગાવ્યો હતો. આ પછી તેમની વિરુદ્ધ IPCની કલમ 354A હેઠળ કેસ નોંધવામાં આવ્યો છે. પીડિતાની માતાનો આરોપ છે કે યેદિયુરપ્પાએ આ વર્ષે 2 ફેબ્રુઆરીના રોજ ડોલર્સ કોલોની સ્થિત તેમના નિવાસસ્થાને મીટિંગ દરમિયાન તેમની પુત્રીની છેડતી કરી હતી. જો કે યેદિયુરપ્પાએ હાઈકોર્ટમાં આગોતરા જામીન અને એફઆઈઆર રદ કરવા માટે બે અલગ-અલગ અરજી કરી છે.