જમ્મુ અને કાશ્મીરના પહેલગામમાં બનેલી ઘટના બાદ, ભારત અને પાકિસ્તાન વચ્ચે તણાવના સમયગાળા બાદ યુદ્ધવિરામની ઘોષણા કરવામાં આવી હતી. હાલમાં સરહદ પર શાંતિ છે પરંતુ પાકિસ્તાન પોતાની ગતિવિધિઓ બંધ કરી રહ્યું નથી. સંભવિત જોખમોને ધ્યાનમાં રાખીને, ભારત હજુ પણ એલર્ટ મોડ પર છે અને કંપનીઓએ સરહદી વિસ્તારોમાંથી પસાર થતા વિમાનો માટે નવી એડવાઇઝરી જારી કરી છે.

એરલાઇને સોશિયલ મીડિયા પોસ્ટમાં જણાવ્યું કે સલામતીને ધ્યાનમાં રાખીને, આજે જમ્મુ, લેહ, જોધપુર, અમૃતસર, ભૂજ, જામનગર, ચંદીગઢ અને રાજકોટ આવતી- જતી ફ્લાઇટ્સ રદ કરવામાં આવી છે. અમે પરિસ્થિતિ પર નજર રાખી રહ્યા છીએ અને અપડેટ આપતા રહીશું.

એર ઇન્ડિયાએ પરિસ્થિતિને ધ્યાનમાં રાખીને સુરક્ષા કારણોસર 13 મે, મંગળવારના રોજ આઠ મુખ્ય શહેરો માટે અને ત્યાંથી આવતી ફ્લાઇટ્સ રદ કરવાની જાહેરાત કરતી એક એડવાઇઝરી જારી કરી છે.

અસરગ્રસ્ત એરપોર્ટમાં જમ્મુ, લેહ, જોધપુર, અમૃતસર, ભુજ, જામનગર, ચંદીગઢ અને રાજકોટનો સમાવેશ થાય છે. એક સોશિયલ મીડિયા પોસ્ટ દ્વારા એરલાઇને આ જાહેરાત કરી હતી, જેમાં ભારપૂર્વક જણાવ્યું હતું કે સલામતીને ધ્યાનમાં રાખીને આ નિર્ણય લેવામાં આવ્યો છે.

જોકે એર ઇન્ડિયાએ આ ઘટનાઓની વિગતો જાહેર કરી નથી, પરંતુ સાવચેતીના પગલાંએ સંભવિત સુરક્ષા મુદ્દાઓ અંગે ચિંતા વ્યક્ત કરી છે. આ શહેરોમાંથી મુસાફરી કરતા અને આવતા મુસાફરોને સલાહ આપવામાં આવે છે કે તેઓ તેમની ફ્લાઇટની સ્થિતિ તપાસે અને રિબુકિંગ અથવા રિફંડ માટે એરલાઇનના સપોર્ટ ચેનલોનો સંપર્ક કરે.

એર ઇન્ડિયા ઉપરાંત, ઇન્ડિગો એરલાઇન્સે પણ ૧૩ મે, મંગળવારના રોજ જમ્મુ, અમૃતસર, ચંદીગઢ, લેહ, શ્રીનગર અને રાજકોટની તમામ ફ્લાઇટ કામગીરી રદ કરવાની જાહેરાત કરી છે. સોશિયલ મીડિયા પર શેર કરાયેલા એક નિવેદનમાં, એરલાઇને જણાવ્યું હતું કે, તાજેતરની ઘટનાઓને ધ્યાનમાં રાખીને અને સલામતીને અમારી ટોચની પ્રાથમિકતા તરીકે રાખીને, ૧૩ મેના રોજ જમ્મુ, અમૃતસર, ચંદીગઢ, લેહ, શ્રીનગર અને રાજકોટની ફ્લાઇટ્સ રદ કરવામાં આવી છે.

આના કારણે થયેલી અસુવિધાનો સ્વીકાર કરતાં, ઇન્ડિગોએ કહ્યું, અમે સમજીએ છીએ કે તમારી મુસાફરીના પ્લાનને કેવી રીતે અસર કરી શકે છે અને અમને અસુવિધા બદલ ખૂબ જ દુઃખ છે. અમારી ટીમો પરિસ્થિતિ પર નજીકથી નજર રાખી રહી છે અને સમય સમય પર અપડેટ્સ આપતી રહેશે. એરપોર્ટ પર જતા પહેલા મહેરબાની કરીને અમારી વેબસાઇટ અથવા એપ્લિકેશન પર તમારી ફ્લાઇટની સ્થિતિ તપાસો. કોઈપણ સહાય માટે, અમે હંમેશા મદદ કરવા માટે તૈયાર છીએ.