લોકસભા ચૂંટણી 2024ના ચાલી રહેલા વલણોમાં NDAની બહુમતી જોઈ શકાય છે. ભાજપના નેતૃત્વમાં એનડીએ 290થી વધુ સીટો પર સતત આગળ ચાલી રહ્યું છે. કોંગ્રેસની આગેવાની હેઠળ ઇન્ડિયા ગઠબંધન પણ છેલ્લી ચૂંટણીઓ કરતાં વધુ સારો દેખાવ કરી રહ્યો છે. ઇન્ડિયા ગઠબંધન પણ 230 સીટ સુધી પહોંચી ગયું છે. ભાજપ એક જ 272નો બહુમતીનો આંકડો પાર કરી શકશે એવું લાગતું નથી. ભાજપે ટીડીપી અને જેડીયુ જેવા સાથી પક્ષો પર નિર્ભર રહેવું પડશે.

બીજી તરફ ઇન્ડિયા ગઠબંધન બહુમતીની નજીક જઈ રહી હોવાથી મહાગઠબંધનના મોટા નેતાઓ સક્રિય થઈ ગયા છે. એવી વાત ફેલાઈ રહી છે કે મહારાષ્ટ્રના રાજકારણના ભીષ્મ પિતામહ ગણાતા શરદ પવાર ટીડીપીના વડા એન ચંદ્રબાબુ નાયડુના સંપર્કમાં આવ્યા હતા. પરંતુ પવારે કોઈપણ અટકળોને નકારી કાઢી હતી. NDA ગઠબંધનને જે બેઠકો મળી રહી છે તેમાં TDPનો હિસ્સો મોટો (બીજો સૌથી મોટો) છે. આંધ્રપ્રદેશમાં ભાજપ અને ટીડીપીએ સંયુક્ત રીતે લોકસભા અને વિધાનસભાની ચૂંટણી લડી હતી. આંધ્રપ્રદેશમાં ટીડીપી હાલમાં 16 સીટો પર આગળ છે.

શરદ પવારે કહ્યું કે તેમણે હજુ સુધી નીતિશ કુમાર અને ચંદ્રાબાબુ સાથે વાત કરી નથી પરંતુ તેમની સાથે વાત કરે તેની પૂરી સંભાવના છે. પવારે કહ્યું કે આવતીકાલે દિલ્હીમાં ઈન્ડિયા બ્લોકની બેઠક છે જેમાં આગળ શું કરવું તે અંગે નિર્ણય લેવામાં આવશે. જો નાયડુ કે નીતિશ કુમારના વલણમાં કોઈ ફેરફાર થાય છે તો એનડીએને સરકાર બનાવવામાં મુશ્કેલીનો સામનો કરવો પડી શકે છે.

આ પહેલા ટીડીપીના વડા નારા ચંદ્રબાબુ નાયડુએ વડાપ્રધાન નરેન્દ્ર મોદી અને કેન્દ્રીય મંત્રી અમિત શાહ સાથે ફોન પર વાત કરી હતી. ટીડીપી નેતાએ એનડીએ ગઠબંધનને મહત્તમ બેઠકો મેળવવા બદલ અભિનંદન પાઠવ્યા હતા. જ્યારે વડાપ્રધાન મોદી અને અમિત શાહે આંધ્ર પ્રદેશમાં NDA ગઠબંધનની શાનદાર જીત પર ચંદ્રબાબુ નાયડુને અભિનંદન પાઠવ્યા હતા. જે બાદ ચંદ્રબાબુ નાયડુએ બંને નેતાઓનો આભાર માન્યો હતો.

પાર્ટીએ ફરી એકવાર JDU પક્ષ બદલવાની કોઈપણ અટકળોને નકારી કાઢી છે. જેડીયુના નેતા કેસી ત્યાગીએ કહ્યું છે કે સીએમ નીતિશ કુમાર અને તેમની પાર્ટી જેડીયુ એનડીએ સાથે રહેશે. આ સાથે બિહારના નાયબ મુખ્યમંત્રી સમ્રાટ ચૌધરી પણ રાજ્યના સીએમ નીતિશ કુમારને મળવા પહોંચ્યા છે.

જેમ જેમ લોકસભા ચૂંટણીના પરિણામોનું ચિત્ર સ્પષ્ટ થશે તેમ તેમ નેતાઓ વચ્ચેની આ વાતચીત અને બેઠકો મહત્વની બનશે.