રાજકોટ, લોધિકા અને પડધરી તાલુકાના 180 ગામોનું વિશાળ કાર્યક્ષેત્ર ધરાવતા સૌરાષ્ટ્રના સૌથી મોટા એવા રાજકોટ માર્કેટ યાર્ડમાં આજે શરદપૂર્ણિમાથી ખરા અર્થમાં શિયાળુ સિઝન શરૂ થતાં ખરીફ પાકની આવકોથી યાર્ડ છલકાઇ ઉઠ્યું હતું. આજે 45,000 ગુણી મગફળી અને 11,000 ભારી કપાસની આવક થઇ હતી. ખેડૂતોના 1000થી વધુ વાહનોની મધરાતથી યાર્ડ બહાર લાઇન લાગી હતી જેની વરસતા વરસાદમાં નવનિર્મિત પ્લેટફોર્મ નીચે ઉતરાઇ કરાવવામાં આવી હતી. રાજકોટ માર્કેટ યાર્ડમાં નવા બનેલા ડોમને કારણે સતત વરસતા વરસાદમાં પણ મગફળીની ઉતરાઈ ચાલુ રખાવી અંદાજે 600થી વધુ મગફળી ભરેલા વાહનને માર્કેટયાર્ડમાં પ્રવેશ આપી નવા ડોમમાં મગફળીની સુરક્ષિત રીતે ઉતરાઈ કરવામાં આવી હતી. રાજકોટ માર્કેટ યાર્ડના ચેરમેન જયેશ બોઘરા સહિતની ટીમએ સતત ખડેપગે રહી આ ઉતરાઈ વ્યવસ્થા પૂર્ણ કરાવી હતી. આજે માર્કેટ યાર્ડમાં મગફળીની આવક 45,000 ગુણી તથા કપાસની આવક 11,000 ભારી તેમજ અન્ય જણસીઓ ભરેલા વાહનોને માર્કેટ યાર્ડમાં ક્રમવાર પ્રવેશ આપી ઉતરાઇ કરાવવામાં આવી હતી. રાજકોટ માર્કેટયાર્ડના ચેરમેનશ્રી જયેશભાઈ બોઘરા, બોર્ડ ઓફ ડિરેક્ટર્સ તેમજ સેક્રેટરી બી.આર.તેજાણી સહિતના સ્ટાફ દ્વાર વ્યવસ્થા જાળવવામાં આવી હતી.