નિર્દેશક સંદીપ રેડ્ડી વાંગાની ફિલ્મ 'એનિમલ' બે મહિના પહેલા સિનેમાઘરોમાં રિલીઝ થઈ હતી. પરંતુ વાંગા અને તેમના નિવેદનો હજુ પણ વિવાદમાં છે. તાજેતરનો મામલો સંદીપ રેડ્ડી વાંગાનો કિરણ રાવને જવાબ આપવાનો છે. જેમાં વાંગાએ આમિર ખાનનું નામ ખેંચ્યું હતું. હવે કિરણ રાવે જડબાતોડ જવાબ આપ્યો છે. રિપોર્ટ્સ અનુસાર, થોડા મહિના પહેલા કિરણ રાવે સંદીપ રેડ્ડી વાંગાની ફિલ્મ 'કબીર સિંહ'ને મહિલા વિરોધી ગણાવી હતી. આ અંગે પ્રતિક્રિયા આપતા વાંગાએ હાલમાં જ કિરણના પૂર્વ પતિ આમિર ખાનની જૂની ફિલ્મો પર નિશાન સાધ્યું હતું. હવે કિરણે ફરી એક ઇન્ટરવ્યુ આપ્યું છે જેમાં તે સંદીપને સલાહ આપી રહી છે કે

તે આમિરને તેની ફિલ્મો વિશે સીધી વાત કરે. નવેમ્બરમાં, મીડિયા અહેવાલોમાં એવું બહાર આવ્યું હતું કે કિરણે બોલિવૂડ ફિલ્મોમાં સ્ટોકીંગને ગ્લોરીફાય કરવાના માંમલે ટીકા કરતી વખતે સંદીપ રેડ્ડી વાંગાની ફિલ્મો 'કબીર સિંહ' અને 'બાહુબલી'નું નામ લીધું હતું. ત્યારે થોડા દિવસો પહેલા એક ઇન્ટરવ્યુમાં સંદીપ રેડ્ડી વાંગાએ કહ્યું હતું કે, 'આજે સવારે મારા એક એ.ડી. (સહાયક નિયામક)એ મને એક લેખ બતાવ્યો. તે સુપરસ્ટારની બીજી એક્સ વાઈફનો છે. તે કહે છે કે 'બાહુબલી' અને 'કબીર સિંહ' જેવી ફિલ્મો સ્ટોકીંગને પ્રોત્સાહન આપે છે. મને નથી લાગતું કે તે પીછો કરવા અને નજીક આવવા વચ્ચેનો તફાવત જાણે છે. લોકો સંદર્ભ વગર વસ્તુઓ જુએ છે, આ સંપૂર્ણપણે ખોટું છે.

સંદીપે વધુમાં કહ્યું હતું કે કિરણ રાવે આમિર ખાનને પૂછવું જોઈએ કે તે 'ખંભે જૈસી ખડી હૈ, લડકી હૈ યા છડી હૈ' ગીતમાં શું કરી રહ્યો હતો. તેણે કહ્યું, 'જો તમને 'દિલ' ફિલ્મ યાદ છે, તો તે (આમિર) એક એવી પરિસ્થિતિ બનાવે છે જે બળાત્કારના પ્રયાસ જેવી છે, અને તેના દ્વારા તેને (માધુરીના પાત્રને) અહેસાસ થાય છે કે તે ખોટી છે અને આખરે તે પ્રેમમાં પડે છે. આ બધું શું છે?'

હવે કિરણ રાવે ઈન્ટરવ્યુમાં સંદીપની વાતનો જવાબ આપ્યો છે આમિરનો બચાવ પણ કર્યો. તેણે કહ્યું, મેં સંદીપ રેડ્ડી વાંગાની ફિલ્મો પર ટિપ્પણી કરી નથી કારણ કે મેં તે જોઈ નથી. મેં ઘણી વાર અને ઘણી જગ્યાએ દુષ્કર્મ અને પડદા પર મહિલાઓની રજૂઆત વિશે વાત કરી છે. પણ મેં ક્યારેય કોઈ ફિલ્મનું નામ લીધું નથી. કિરણે વધુમાં કહ્યું, 'તમારે વાંગા રેડ્ડીને પૂછવું જોઈએ કે તેમને કેમ લાગ્યું કે હું તેમની ફિલ્મ વિશે વાત કરી રહ્યો છું.' કિરણે આમિર ખાનની એ વાત માટે પ્રશંસાવ કરી હતી કે તે 'ખંભે જૈસી ખડી હૈ' ગીત માટે માફી માંગી ચૂક્યો છે. સત્યમેવ જયતે સીઝન ૩ના એક એપિસોડમાં આ વિશે વાત કરતા તેણે પોતાના જૂના કામની જવાબદારી લઈને માફી માંગી છે. તેની પ્રશંસા થવી જોઈએ. જો વાંગા આમિર ખાનના કામ વિશે વાત કરી રહ્યા હોય તો હું આમિર ખાન માટે કે તેના દ્વારા કરવામાં આવેલા કોઈપણ કામ માટે જવાબદાર નથી. તે તેમની સાથે સીધી મેન ટુ મેન વાત કરે તો સારું રહેશે.

કિરણની ટિપ્પણીનો જવાબ ફિલ્મ 'એનિમલ'ના સત્તાવાર સોશિયલ મીડિયા હેન્ડલ પરથી પણ આવ્યો છે. સોશિયલ મીડિયા પ્લેટફોર્મ એક્સ પર પોસ્ટ કરીને, ફિલ્મની ટીમે ન્યૂઝ રિપોર્ટની લિંક શેર કરી, જેમાં કહેવામાં આવ્યું છે કે કિરણે 'કબીર સિંહ'નું નામ લીધું છે. ફિલ્મની ટીમે પોસ્ટમાં લખ્યું, 'મિસ કિરણ રાવ... અમે અથવા અમારા નિર્દેશક સંદીપ રેડ્ડી વાંગા, કંઈપણ અનુમાન નથી કરી રહ્યા. આ એક હકીકત છે જે મોટી મીડિયા ચેનલોએ દર્શાવી છે. 'એનિમલ'ના કન્ટેન્ટને લઈને શરૂ થયેલી ચર્ચા આમિર ખાનની અગાઉની ફિલ્મો સુધી પહોંચી ગઈ છે. હવે એ જોવાનું રસપ્રદ રહેશે કે કિરણ રાવ અને વાંગા વચ્ચેની આ ચર્ચાઓનો ધી એન્ડ ક્યારે થશે.