પડધરીના મોવૈયા સર્કલ નજીક આવેલી જગ્યામાં મઢુલી બનાવીને રહેતા સાધુને દંપતિ અને તેના પુત્રએ બેટરીથી શોર્ટ આપતા વૃધ્ધ મહંતને સારવાર માટે રાજકોટ સિવિલ હોસ્પિટલમાં ખસેડવામાં આવ્યા છે.પ્રાપ્ત વિગત મુજબ મોવૈયા સર્કલ પાસે રોડની સાઈડમાં આવેલી જગ્યામાં 12 વર્ષથી મઢુલી બનાવી રહેતા શિવધરગિરી ગંગાધરગિરી ગવકરણ (ઉ.વ.90) ના વૃધ્ધ સાધુ મઢુલીએ હતા ત્યારે બાજુમાં મંદિરમાં રહેતા જેન્તી રામા, તેની પત્ની સવિતાબેન અને પુત્ર દિલીપએ મઢુલીએ આવી ઝગડો કરી બેટરી વડે શોર્ટ આપતા સારવાર માટે રાજકોટ સિવિલ હોસ્પિટલમાં ખસેડવામાં આવ્યા હતા. બનાવ અંગે હોસ્પિટલ ચોકીના સ્ટાફે પડધરી પોલીસને જાણ કરી હતી. સાધુના કહેવા મુજબ હું આ જગ્યા પર 12 વર્ષથી મઢુલી બનાવી ભગવાનનું ભજન કરું છું, બાજુમાં બૌદ્ધ મંદિર આવેલું હોઈ ત્યાં રહેતા લોકો અવારનવાર આ ચાર એકર જગ્યા અમારી છે અને ખાલી કરવા બાબતે ધાક ધમકી આપી ઝગડો કરે છે. ગઈકાલે પણ જગ્યા છોડી ચાલ્યું જવાનું કહી બેટરીથી શોર્ટ આપ્યો હતો. બનાવના પગલે પોલીસે તપાસ હાથ ધરી છે.