ભારત અને કેનેડા વચ્ચેના સંબંધોમાં તણાવ વધી રહ્યો છે. ભારતે ગઈકાલે છ કેનેડિયન રાજદ્વારીઓને હાંકી કાઢ્યા હતા. આ સિવાય ભારતે જેમને નિશાન બનાવવામાં આવી રહ્યા છે એ હાઈ કમિશનર અને અન્ય રાજદ્વારીઓ અને અધિકારીઓને કેનેડામાંથી પાછા બોલાવવાની જાહેરાત કરી છે. આ દરમિયાન કેનેડાના વિદેશ મંત્રી મેલાની જોલીએ મોટું નિવેદન આપ્યું છે. તેમણે વિનંતી કરી છે કે ભારત સરકાર બંને દેશોના ફાયદા માટે આ તપાસને સમર્થન આપે.

કેનેડાના વિદેશ પ્રધાન મેલાની જોલીએ કહ્યું છે કે ભારતીય રાજદ્વારીઓને હાંકી કાઢવાનો નિર્ણય રોયલ કેનેડિયન માઉન્ટેડ પોલીસ (RCMP) દ્વારા ભારત દ્વારા જાહેર કરાયેલ આતંકવાદી હરદીપ સિંહ નિજ્જરની હત્યાના કેસમાં એકત્રિત કરવામાં આવેલા પુરાવાના આધારે લેવામાં આવ્યો હતો. તેમણે ભારતને આ તપાસમાં સમર્થન આપવા વિનંતી કરી છે.

જસ્ટિન ટ્રુડોએ ભારત પર ગંભીર આરોપ લગાવ્યા

નિજ્જર હત્યા કેસમાં ભારત પર આરોપ લગાવતા કેનેડાના વડાપ્રધાન જસ્ટિન ટ્રુડોએ કહ્યું હતું કે, "તમારામાંથી ઘણા ગુસ્સે છે, પરેશાન છે અને ડરેલા છે, હું સમજું છું. આવું ન થવું જોઈએ. વ્યાપાર અને વ્યવસાયમાં કેનેડા-ભારત લોકો વચ્ચેના સંબંધોનો લાંબો ઇતિહાસ છે પરંતુ અમે જે જોઈ રહ્યા છીએ તે સહન કરી શકતા નથી. કેનેડા ભારતની સાર્વભૌમત્વ અને પ્રાદેશિક અખંડિતતાનું સંપૂર્ણ સન્માન કરે છે અને અમે અપેક્ષા રાખીએ છીએ કે ભારત સરકાર કેનેડા માટે આવું જ કરશે."

તેમણે વધુમાં કહ્યું હતું કે, "વડાપ્રધાન તરીકે મારી જવાબદારી છે કે જેઓને લાગે છે કે સુરક્ષા સાથે ચેડા કરવામાં આવ્યા છે તેમને આશ્વાસન આપું  પરંતુ સૌથી અગત્યની બાબત એ છે કે પગલાં લેવાની મારી જવાબદારી છે અને અમે એકજૂટ રહીશું. યુએસ સ્ટેટ ડિપાર્ટમેન્ટે તેના બે નજીકના સાથી અને ભાગીદારો વચ્ચે રાજદ્વારી સંકટ વિષે હજુ સુધી કોઈ નિવેદન આપ્યું નથી."