દોરી વડે ફાંસો ખાવાની કોશિષ : જાપ્તા સાથે સારવારમાં ખસેડાયો

જામનગરના નવાગામ ઘેડ વિસ્તારમાં અઠવાડીયા પુર્વે જનેતા પર દુષ્કર્મ આચરનાર પાપી પુત્રને પોલીસે ઝડપી લીધો હતો અને જરુરી કાર્યવાહી બાદ જેલ હવાલે કરવામાં આવ્યો હતો દરમ્યાનમાં ગઇકાલે જેલમાં દોરી વડે ફાંસો ખાવાની કોશિષ કરતા પોલીસ જાપ્તા વચ્ચે સારવરમાં લાવવામાં આવ્યો હતો.
જામનગરના નવાગામ ઘેડ સ્લમ એરીયામાં આશરે અઠવાડીયા પહેલા રાત્રીના સમયે માતા પર નજર બગાડીને નશાખોર કપાતર પુત્રએ દુષ્કર્મ ગુજાર્યુ હતું, દરમ્યાનમાં મામલો પોલીસ મથકે પહોચ્યો હતો અને સીટી-બીમાં ફરીયાદ દાખલ થતા પોલીસે આરોપી નરાધમ કપુતની ધરપકડ કરી હતી, જયારે ભોગ બનનારની મેડીકલ તપાસણી સહિતની કાર્યવાહી કરવામાં આવી હતી.
રાક્ષસી કૃત્ય આચરનાર નરાધમ કપાતરને પકડીને જરુરી કાર્યવાહી હાથ ધરી હતી તેમજ પુછપરછ કરતા નરાધમે નશામાં એટલો ચકચુર હતો કે નવાગામ ઘેડ પહોચ્યા પછી યાદ નથી એવું રટણ કરતા પોલીસ દ્વારા આગવી ઢબે કાર્યવાહી અને પુછપરછ કરી જેલ હવાલે કર્યો હતો.
આરોપી કપુતે ગઇકાલે જેલમાં કોઇ દોરી વડે ફાંસો ખાઇ આપઘાતનો પ્રયાસ કરતા જેલ તંત્રમાં દોડધામ મચી હતી અને પોલીસ જાપ્તા વચ્ચે તાબડતોબ આરોપીને જામનગરની જી.જી. હોસ્પીટલમાં સારવાર માટે ખસેડવામાં આવ્યો હતો.