હિટવેવ વચ્ચે પણ વેકેશનનો ટ્રાફિક નીકળતા રાજકોટ એસટીની દૈનિક આવક રૂ.૭૦ લાખે પહોંચી છે, સામાન્ય દિવસોમાં દૈનિક આવક રૂ.૬૦ લાખ રહેતી હોય છે પરંતુ હાલ વેકેશનનો ટ્રાફિક નીકળતા આવકમાં ૧૦ લાખનો વધારો થયો છે. અલબત્ત હજુ એક્સ્ટ્રા બસો દોડાવવી પડે તેટલો ટ્રાફિક નથી પરંતુ ડેઇલી શેડ્યુલની તમામ બસો ફૂલ પેક દોડી રહી છે તેમજ એડવાન્સ બુકિંગ માટે પણ ભારે ધસારો જોવા મળી રહ્યો છે.

વિશેષમાં રાજકોટ એસટી ડિવિઝનના વિભાગીય નિયામક જે.બી.કલોતરાએ જણાવ્યું હતું કે, રાજકોટ એસટી ડિવિઝન હેઠળના તમામ નવ ડેપોના મેનેજરો સાથે ચર્ચા કરી આજે તેઓ એક્સ્ટ્રા બસ સેવા શરૂ કરવા અંગેનું પ્લાનિંગ કરશે. તેમણે ઉમેર્યું હતું કે તા.૨૮ને સોમવારથી એક્સ્ટ્રા બસ શરૂ કરવાની તૈયારી હતી પરંતુ હજુ સુધી એક્સ્ટ્રા બસ મુકવી પડે તેટલો ટ્રાફિક નથી.આગામી દિવસોમાં રાજકોટ એસટી બસ પોર્ટથી દ્વારકા, સોમનાથ, અમદાવાદ, સુરત, જૂનાગઢ, અમરેલી, ભુજ, ભાવનગર સહિતના રૂટ તેમજ વિવિધ પ્રવાસન સ્થળો અને તીર્થધામોના રૂટ ઉપર વેકેશન એક્સ્ટ્રા બસ દોડાવવાનું આયોજન છે રાજકોટ એસટી ડિવિઝન દ્વારા ૬૦ એક્સ્ટ્રા બસ દોડાવાશે તદઉપરાંત જરૂર પડે તો વધુ બસ દોડાવવા પણ તૈયારી રાખવામાં આવી છે.