પોલીસ તંત્રને સાથે રાખીને એસ્ટેટ શાખા દ્વારા રવિવારે પણ દબાણ હટાવ ઝુંબેશ

જામનગર મહાનગરપાલિકાની એસ્ટેટ શાખા દ્વારા દબાણ હટાવ ઝુંબેશ રવિવારે રજા ના દિવસે પણ અવિરત ચાલુ રાખવામાં આવી છે, અને જામનગરના દરબારગઢ સર્કલ ઉપરાંત બર્ધનચોક વિસ્તારમાં આજે રવિવારે રજા ના દિવસે પણ ફરીથી દબાણ હટાવ ઝુંબેશ ચાલુ કરવામાં આવી હતી. જે સમયે ધંધાર્થીઓ અને તંત્ર વચ્ચે થોડીવાર માટે ઘર્ષણ  થયું હતું.

સિટી એ. ડિવિઝન ના પોલીસ બંદોબસ્તની વચ્ચે રવિવારે દબાણ હટાવ ઝુંબેશ હાથ ધરવામાં આવી હતી, અને કેટલાક રેકડી, પથારાઓ, લાકડાના ટેબલ, લોખંડના પલંગ, પ્લાસ્ટિકની ખુરશીઓ, સ્ટુલ વગેરે કબજે કરી લઈ અલગ અલગ બે જેટલા ટ્રેક્ટરમાં ભરીને જામનગર મહાનગરપાલિકાની કચેરીમાં જમા કરાવી દેવામાં આવી છે. 

ઉપરોક્ત વિસ્તારમાં અનેક ધંધાર્થીઓ દ્વારા ફરી રેકડી પથારા સહિતના દબાણ ખડકી દીધા હોવાથી આ કાર્યવાહી હાથ ધરવામાં આવી હતી. જેમાં કટલેરી નો માલ સામાન સહિત ના ધંધાર્થીઓનો સમાવેશ થાય છે, જેઓની દબાણ હટાવવાની કામગીરી સમયે તંત્ર ને કેટલાક ધંધાર્થીઓ સાથે સંઘર્ષ કરવો પડ્યો હતો. પરંતુ તંત્રએ મચક આપી ન હતી, અને તમામ નો સામાન જપ્ત કરી લેવાયો છે.

સાધના કોલોની રોડ પર ખાનગી પાર્ટી દ્વારા લગાવવામાં આવેલા ૪૦ સાઇનિંગ બોર્ડ હટાવાયા

જામનગરના સાધના કોલોની માર્ગ પર કેટલાક ખાનગી પાર્ટીઓ દ્વારા પોતાના વેપાર ધંધાના લોકેશન બતાવવા માટે લોખંડના એંગલ ઊભા કરીને જાહેરાતના બોર્ડ લગાવી દેવામાં આવ્યા હતા. આવા અલગ અલગ ૪૦ જેટલા લોખંડના એંગલ કે જેને જમીનમાંથી કાપીને દૂર કરી લેવાયા હતા, અને તમામ જપ્ત કરીને જામનગર મહાનગરપાલિકાની કચેરીમાં જમા કરાવી દેવાયા છે.