ખંભાળિયામાં આગામી ગુરૂવાર તારીખ 3 થી આધ્યશક્તિની ઉપાસનાના પર્વ નવરાત્રીનો મંગલ પ્રારંભ થઈ રહ્યો છે. ત્યારે ખંભાળિયા તથા આસપાસના વિસ્તારોમાં તહેવારના આ દિવસોમાં કોઈ વીજ વિક્ષેપ ન સર્જાય તે માટે સત્તાવાળાઓને લેખિત રજૂઆત કરવામાં આવી છે.

ખંભાળિયા શહેર ભાજપ મહામંત્રી ઈન્દ્રજીતસિંહ પરમાર દ્વારા અહીંના વીજ અધિકારીને એક લેખિત આવેદન પત્ર પાઠવીને નવરાત્રી દરમિયાન શહેર તથા આસપાસના વિસ્તારોમાં યોજાતી નાની-મોટી ગરબીના આયોજનમાં હિન્દુ પરિવારની દીકરીઓ અનુષ્ઠાન કરે છે. આ સાથે માઈ ભક્તો નવરાત્રી દરમિયાન ગરબી જોવા સહિતના ધાર્મિક આયોજનોમાં જોડાય છે. ત્યારે આ તહેવારના દિવસોમાં કોઈ વીજ વિક્ષેપ ન થાય તેની ખાસ તકેદારી રાખવા તેમજ આ માટે જરૂરી સમારકામ નવરાત્રી પહેલા જ પૂર્ણ થાય તે માટે રજૂઆત કરાઈ છે.