17 નવેમ્બર સુધી તમામ ખાનગી અને સરકારી શાળાઓ અને કોલેજો બંધ રાખ્યા બાદ પાકિસ્તાનના પંજાબ પ્રાંતની સરકારે શુક્રવારે પણ તમામ જાહેર પાર્ક, પ્રાણી સંગ્રહાલયો, ઐતિહાસિક સ્થળો અને રમતના મેદાનોને 17 નવેમ્બર સુધી બંધ કરી દીધા છે. પ્રાંતનો મોટો હિસ્સો ગાઢ ધુમ્મસનો સામનો કરી રહ્યો છે અને હવા ગુણવત્તા સૂચકાંક જોખમી સ્તરે રહે છે.

વિઝિબિલિટી ઘટીને થઈ 100 મીટર

14 મિલિયનની વસ્તી ધરાવતું લાહોર શહેર ઓક્ટોબરથી ધુમ્મસનો સામનો કરી રહ્યું છે. ગુરુવારે શહેરનો હવા ગુણવત્તા સૂચકાંક (AQI) 1000 હતો અને શુક્રવારે AQI 600થી ઉપર હતો. 300 થી ઉપર હોવું જોખમી માનવામાં આવે છે. કલાકો સુધી છવાયેલા ધુમ્મસના કારણે શહેરીજનોને અંધારામાં જીવન જીવવું પડ્યું હતું. વિઝિબિલિટી ઘટીને લગભગ 100 મીટર થઈ ગઈ છે.

રાજધાની લાહોર સહિત પંજાબના 18 જિલ્લામાં સરકારી કર્મચારીઓએ ઘરેથી કામ કરવું પડશે. શુક્રવારે લાહોરની અદાલતે તમામ બજારોને રાત્રે 8 વાગ્યા પછી બંધ રાખવાનો આદેશ આપ્યો છે. સત્તાવાળાઓએ પહેલાથી જ મેરેજ હોલને રાત્રે 10 વાગ્યા સુધી બંધ કરવાનો આદેશ આપી દીધો છે.