કાયમી સફાઈ વ્યવસ્થા પણ કરાઈ: યાત્રીકે ફોટા મોકલતા ત્વરીત કાર્યવાહી

દેવભૂમિ જિલ્લાનું દ્વારકા આ વર્ષે તહેવારોમાં હોટ ફેવરિટ રહેતા લગભગ તેર લાખથી વધુ યાત્રિકો સાથે રાજ્યમાં પ્રથમ રહયુ હતુ. ત્યારે યાત્રિકોને દ્વારકા જેવા પવિત્ર સ્થળે પવિત્ર ગોમતી ઘાટ તથા નદીની આજુબાજુ ગંદકી હોવાની વારંવાર ફરિયાદો વચ્ચે જાગૃત નાગરિક યાત્રીકે દ્વારકાની મુલાકાત લેતા ગંદકીના ફોટા જિલ્લા કલેક્ટરને પહોંચાડતા જિલ્લા કલેક્ટર પંડ્યાએ તુરંત જ દ્વારકા પ્રાંત અધિકારી તથા પાલિકા તંત્રને સૂચના આપતા તંત્ર દોડ્યું હતું.

જેના પગલે તુરંત જ ગોમતી ઘાટના તમામ સ્થળો પરથી ગંદકી અદ્રશ્ય થઈ જતા યાત્રિકોમાં રાહતની લાગણી ફેલાઇ હતી.કલેક્ટર જી.ટી. પંડ્યા દ્વારા ગોમતી ઘાટના સ્થળે પાલિકા તંત્ર દ્વારા નિયમિત સફાઈ થાય તથા તેનું રેવન્યુ તંત્ર દ્વારા નિયમિત મોનીટરીંગ થાય તે માટે આજથી જ વ્યવસ્થા ગોઠવી દીધી હતી. તથા સપ્તાહમાં બે વખત ઉચ્ચ અધિકારી પણ ચેકીંગ કરે તેવી વ્યવસ્થા કરી યાત્રાળુઓને પરેશાની ના થાય તેવી વ્યવસ્થા ગોઠવવાની સાથે યાત્રિકોને કચરો ડસ્ટબીનમાં જ ફેંકવા તથા જ્યાં ત્યાં ગંદકી ના કરીને તંત્રને સહકાર આપવા પણ અપીલ કરી હતી