વીંછિયા પોલીસ સ્ટેશનમાં પીઆઇની ચેમ્બરમાં પીઆઇની હાજરીમાં એક અરજદારે વીજ ના.ઇજનેરને તમાચો મારી દઇ જાનથી મારી નાખવાની ધમકી આપી હતી.જે અંગે ઇજનેરની ફરિયાદ પરથી પોલીસે આરોપી સામે ફરજમાં રૂકાવટ સહિતની કલમ હેઠળ ગુનો નોંધી કાયદેસરની કાર્યવાહી કરી હતી. વીજ બીલને લઇ અરજદારે અરજી કરી હોય જે અંતર્ગત બંનેને પોલીસ સ્ટેશન બોલવામાં આવ્યા હતાં દરમિયાન આ ઘટના બની હતી.

જાણવા મળતી વિગતો મુજબ,વીંછિયામાં સત્યજીત સોસાયટીમાં રહેતા અને પાંચ મહિનાથી વીંછિયામાં પીજીવીસીએલમાં નાયબ ઇજનેર તરીકે ફરજ બજાવનાર ગૌરવભાઇ અશ્ર્વીનભાઇ બોડા(ઉ.વ ૩૦) દ્વારા વીંછિયા પોલીસ મથકમાં નોંધાવવામાં આવેલી ફરિયાદમાં આરોપી તરીકે રૂપાવટી ગામમાં રહેતા હિતેશ લવજીભાઇ ગાબુનું નામ આપ્યું છે.

ફરિયાદમાં જણાવ્યું હતું કે,ગઇકાલે તેઓ પોતાની ફરજ પર હતા ત્યારે સાંજના વીંછિયા પોલીસ સ્ટેશનથી ફોન આવ્યો હતો અને કહ્યું હતું કે,અરજદાર હિતેશ ગાબુએ જીઇબી ઓફિસ વિરૂધ્ધમાં અરજી કરી હોય જેથી નીવેદન માટે બોલવતા ફરિયાદી અહીં પોલીસ સ્ટેશન ગયા હતાં.અહીં પીઆઇની ચેમ્બરમાં ફરિયાદીએ અરજદારને અરજી બાબતે સમજાવી ચેકિંગને લઇ તમારી કોઇ ફરિયાદ હોય તો ૫૦ ટકા રકમ ભરી પીજીવીસીએલના નિયમ મુજબ,ઇકેકટ્રીકલ ઇન્સ્પેકટરમાં ચેકીંગ બાબતે રજુઆત કરી શકો છો તેમ કહેતા આરોપી હીતેશ ગાબુએ ઉશ્કેરાઇ જઇ પીઆઇ ચેમ્બરમાં જ વીજ ઇજનરેને ગાળો આપી ઝપાઝપી કરી લાફો મારી દીધો હતો અને જાનથી મારી નાખવાની ધમકી આપી હતી.દરમિયાન પોલીસ સ્ટાફે વચ્ચે પડી ઇજનેરને છોડાવ્યા હતાં.

વધુમાં જણવા મળતી વિગતો મુજબ,આરોપી ઘરમાં ઘરેલું કનેકશનમાં કોર્મિશયલ વીજ વપરાશ કરતા હોય જેથી ચેકિંગ દરમિયાન તેને તફાવતની રકમ રૂ.૨૪ હજાર માટે બીલ ફટકારવામાં આવ્યું હતું.જે બાબતે તેણે અરજી કરી હતી.બાદમાં પોલીસ સ્ટેશનમાં જ ઇજનેર પર હુમલો કરી દીધો હતો.આ અંગે ના.ઇજનેરની ફરિયાદ પરથી આરોપી સામે ફરજમાં રૂકાવટ સહિતની કલમ હેઠળ ગુનો નોંધી કાયદેસરની કાર્યવાહી કરી હતી.