રૂવાપરી રોડ પર આવેલી રણજીતકુમાર એન્ડ બ્રધર્સ નામની પેઢીમાં ચાલી રહેલ ક્ધસ્ટ્રક્શન સાઇટમાં તોડફોડ કરી ખંડણી માંગવાના બનાવમાં સંડોવાયેલા ફરાર આરોપીને એસઓજીએ ઝડપી પાડયો હતો. પોલીસની પ્રાથમિક પૂછપરછમાં જ આરોપી સામે અલગ અલગ પોલીસ સ્ટેશનમાં હત્યા સહિતના પાંચ ગુના દાખલ થયેલા હોવાનું ખુલવા પામ્યું હતું. પોલીસે આરોપીને ઘોઘારોડ પોલીસ સ્ટેશનના હવાલે કરવાની કાર્યવાહી હાથ ધરી છે. 
કેસની વિગત એવી છે કે, જગદીશભાઈ ઓમપ્રકાશ રાજાઇ (રહે.સરદારનગર, શ્રીરામ સોસાયટી)એ અગાઉ ઘોઘારોડ પોલીસ સ્ટેશનમાં આકાશ તેમજ બે અજાણ્યા શખ્સ વિરુદ્ધ ફરિયાદ નોંધાવી હતી કે, આરોપીઓ ફરિયાદીની સાઇટ પર ગયા હતા અને ત્યાં આગળ તેમણે સીસીટીવી કેમેરા,મીટર અને ઈલેક્ટ્રીક વસ્તુઓની તોડફોડ કરી રૂા.૮૦,૦૦૦નું નૂકશાન કર્યું હતું. આરોપીઓએ ફરિયાદીના
ભાગીદાર પાસે પણ હપ્તાની માંગણી કરી હતી જો હપ્તો નહી મળે તો જોઈ લઈશ તેવી ધમકી આપી હતી. આ બનાવમાં આરોપી આકાશ ઉર્ફે કણો ભરતભાઈ વાઘેલા (રહે.વીમાના દવાખાના પાસે) ફરાર હોય એસઓજી પોલીસે બાતમીના આધારે આરોપી આકાશને ઝડપી પાડી તેને ઘોઘારોડ પોલીસના હવાલે કરવાની કાર્યવાહી હાથ ધરી હતી.