અમેરિકાના રાષ્ટ્રપતિ ડોનાલ્ડ ટ્રમ્પે વ્હાઇટ હાઉસમાં વડાપ્રધાન નરેન્દ્ર મોદી સાથેની એક મહત્વપૂર્ણ બેઠક દરમિયાન ભારતને F-35 સ્ટીલ્થ ફાઇટર જેટ ઓફર કર્યા. અમેરિકા તરફથી ભારતને મળી રહેલી લશ્કરી સહાયને લઈને પાકિસ્તાનનું ટેન્શન વધી ગયું છે. એટલું જ નહીં, પાકિસ્તાને આ પગલાને દક્ષિણ એશિયામાં શાંતિ માટે ખતરો ગણાવ્યો છે.

સ્થાનિક મીડિયા અહેવાલો અનુસાર, પાકિસ્તાને કહ્યું કે, આવા પગલાથી પ્રાદેશિક લશ્કરી સંતુલનને ખલેલ પહોંચી શકે છે અને વ્યૂહાત્મક સ્થિરતાને નુકસાન થઈ શકે છે. પાકિસ્તાનના વિદેશ મંત્રાલયના પ્રવક્તાએ પ્રેસ સાથે વાત કરતા કહ્યું કે, ભારતમાં અદ્યતન લશ્કરી ટેકનોલોજીના આયોજિત આગમનથી અમારુ ટેન્શન વધી ગયું છે.

આંતરરાષ્ટ્રીય ભાગીદારોએ જમીની વાસ્તવિકતા સમજવી જોઈએ
પાકિસ્તાનના વિદેશ મંત્રાલયના પ્રવક્તાએ કહ્યું કે, અમે અમારા આંતરરાષ્ટ્રીય ભાગીદારોને દક્ષિણ એશિયામાં શાંતિ અને સુરક્ષાના મુદ્દાઓ પર એક સર્વાંગી અને ઉદ્દેશ્યપૂર્ણ અભિગમ અપનાવવા વિનંતી કરીએ છીએ. તેમણે કહ્યું કે, આપણા બધા ભાગીદારોએ એવી બાબતોને ટેકો આપવાનું ટાળવું જોઈએ જે એકપક્ષીય હોય અને જમીની વાસ્તવિકતાઓથી વિચલિત હોય.

અમેરિકા ભારતને કયા ઘાતક શસ્ત્રો આપશે?
બેઠક બાદ, પીએમ નરેન્દ્ર મોદી અને રાષ્ટ્રપતિ ડોનાલ્ડ ટ્રમ્પે ભારત અને અમેરિકા વચ્ચે 10 વર્ષની સંરક્ષણ ભાગીદારી અને મુખ્ય શસ્ત્રોના સહ-ઉત્પાદનને ચાલુ રાખવાની જાહેરાત કરી. આ સાથે, ડોનાલ્ડ ટ્રમ્પે ભારતને લશ્કરી હાર્ડવેરનું વેચાણ વધારવાનું વચન આપ્યું હતું, જેમાં F-35 સ્ટીલ્થ ફાઇટર જેટનો સંભવિત પુરવઠો પણ સામેલ છે.

અમેરિકા ટૂંક સમયમાં ભારતની સંરક્ષણ જરૂરિયાતોને પૂર્ણ કરવા માટે આ વર્ષે જેવલિન એન્ટી-ટેન્ક ગાઇડેડ મિસાઇલ અને સ્ટ્રાઇકર આર્મર્ડ વાહનના વેચાણ અને ઉત્પાદન સાથે આગળ વધશે. ભારત અમેરિકા પાસેથી F-35 ફાઇટર જેટ ખરીદવાની યોજના બનાવી રહ્યું છે કે કેમ તે પ્રશ્નના જવાબમાં વિદેશ સચિવ વિક્રમ મિશ્રીએ કહ્યું કે તે હજુ પણ પ્રસ્તાવના તબક્કામાં છે.