દેશની ઉંચી ઉંચી ઈમારતો અને લાંબી દીવાલો પર બ્રશ અને એરગનથી પેઇન્ટિંગ કરીને ગોંડલના ઇન્ટરનેશનલ કલાકાર તરીકે મુનિર બુખારી જાણીતા બન્યા છે. તાજેતરમાં તેમણે ભુરા બાવાના ચોરે ૨૩૨૫ ફિટ સાઇઝનું વિશાળકાય ભગવાન શ્રી રામચંદ્રનું અતિ સુંદર અને સૌમ્ય ભિત ચિત્ર દોરીને આ ચોરાની ભવ્યતામાં વધારો કર્યો છે. ચિત્ર બનાવવામાં ૬ દિવસનો સમય લાગ્યો હતો.
એકલા હાથે ભગવાન શ્રી રામનું ચિત્ર બનાવીને તેમણે દરેકને મંત્રમુગ્ધ કર્યા હતા. જેના માટે તેમનું સન્માન કરવામાં આવ્યું હતું. આ તકે બહોળી સંખ્યામાં સમાજ આગેવાનો સ્થાનિક તેમજ બહારગામથી મહેમાનો હાજર રહ્યા હતા. નાગરિક બેંકના ચેરમેન અશોકભાઈ પીપળીયાના માર્ગદર્શન હેઠળ આયોજન કરવામાં આવ્યું. આ સન્માન ભુરાબાવાના ચોરો, રામાનંદી સાધુ સમાજ, ભોજરાજપરા યુવક મંડળ- ગોંડલ, પોરબંદર સાંસદ રમેશભાઈ ધડુક, ગોંડલ માજી ધારાસભ્ય, જયરાજસિંહ જાડેજા, લીમડીના ધારાસભ્ય કિરીટસિંહ રાણા, નાગરિક બેન્કના ચેરમેન અશોકભાઈ પીપળીયા દ્વારા કરવામાં આવ્યું હતું. તેમણે જણાવ્યું કે આ ચિત્ર દોરવાનું કામ હાથમાં લીધા પછી, અયોધ્યા મંદિરના ગર્ભગૃહમાં ચિત્ર દોરવાનું આમંત્રણ આવ્યું હતું પણ ગોંડલમાં કામ ચાલુ હોવાથી અયોધ્યાના કામને દિલગીરી સાથે ના પાડી હતી.